هناء أبو علي – كود الرباط ///

سي المهدي: فينيتو  إذا كان سي مهدي المغني، خلا المغاربة يضحكو بأغنيتو فينيتو، فسي المهدي الوزير بالعكس خلانا نكعاو، بهاد الصمت ديالو على لي طرا فالوليدية من اعتداءات جنسية على أطفال أبرياء. وإذا كان سي مهدي المغني دار رد فعل على حتى التنمر ديال بزاف د الناس بواحد تيساع الخاطر كبير، فسي المهدي الوزير حرك صحابو، وبداو بالتيليفونات للناس لي كتنتقدو، بلي حقا والواد الوزارة ديالو معندها دخل في الموضوع.

لا أسي المهدي، قطاع التخييم مزال تابع للوزارة ديالك. وإذا كنتي معطيتي حتى شي ترخيص لجمعية هاد البيدوفيل باش تنظم مخيم في أباغتومون، فالواقع أن هاد الجمعية دارت إعلان في صفحتها في الفيسبوك لداك المخيم، وحددات كاع ثمن التخييم في 700 درهم للدري ( الوالدين يخلصو والمنظمين يغتصبو)، وماشي غير هاد الجمعية، بزاف د الجمعيات، منها الحقيقية وأخرى وهمية، دارت إعلانات بتنظيم مخيمات، وهي معندهاش رخص من طرف وزارة السي المهدي، والوزارة مدارتش بلاغات كتوضح للوالدين بلي هادشي غير قانوني، وبلي هاد الناس معندهوم علاقة بالمخيمات، وبلي ولادهوم يمكن يتعرضو لمخاطر إلى مشاو لهاد المخيمات العشوائية.

وبلا متقولينا بلي الوزارة مفراسهاش، حيت مصيبة إذا ماكانش فراسها، وهنا نفكرو سي المهدي بلي أن وزارة التعليم العالي مثلا، ولي انتقدناها أكثر من مرة، فين ما شي حد كيدير إعلان على شي كلية أو مدرسة عليا، ومزال معندو ترخيص نهائي، كتدير بيان تحذر الناس من التسجيل فديك المعاهد غير المرخصة.

ودابا نطرحو السؤال الحقيقي: لاش كثرات هاد المخيمات العشوائية؟ ببساطة، حيت من سنوات، ومراكز تخييم تابعة للوزارة كتسد، ونقص العدد ديالها، زيادة أن الوزارة هاد العام منعات بعض الجمعيات لي مختصة فهاد المجال، ولي عندها مؤطرين متخصصين، إما من تنظيم المخيمات كاغيمون، أو من تنظيم شي مرحلة من مراحل التخييم بمبررات واهية.  وهادشي خلا أعداد الأطفال المستفيدين من تخييم قانوني ومنظم وتربوي ينقص بزاف هاد السنة، والوالدين الله يحسن العوان فهاد الغلا، فما كان حتى حل أمام شي وحدين سوى اللجوء لهاد المخيمات العشوائية، خصوصا أنهم معارفينش بلي ماخاضعاش لمراقبة الوزارة، لي اكتفت بالتفرج.   من جهة، كتمنع الجمعيات المختصة، ومن جهة كتفرج على المخيمات العشوائية.

تصورو أنه في السمارة الوزارة ما رخصات لحتى شي جمعية متخصصة في التخييم، هاد المدينة لي معندها بحر، معندها لابيسين، مافيها أماكن ترفيه للأطفال (وحتى هاد الشي مسؤولية الوزارة)، والحرارة فيها بحال جهنم، وبزاف د العائلات دارت كل الإجراءات القانونية هي والجمعيات المتخصصة، باش ولادهوم يخيمو فالشمال، وفالدقيقة الأخيرة بعد ما جمعو حوايجهوم، كيجي الرفض، وبلاصة مايخيمو الأطفال، مشاو مع والديهيم ينظمو وقفة أمام مقر المندوبية  ديال الوزارة للاحتجاج تحت الشمس. سي المهدي، خاص دير فينيتو للمكلفين بملف التخييم عندك، ولي خيمو فديك الوزارة وفديك السيكتور بلا فائدة.