كود هناء ابو علي ///

البارح لاربعا 13 يوليوز 2022 رجع الوفد الرسمي من الحج. الوفد كان رأسو وزير العدل الامين العام لحزب الاصالة والمعاصرة عبد اللطيف وهبي. يونس السكوري وزير الإدماج الاقتصادي والمقاولة الصغرى والتشغيل والكفاءات كان حتى هو فالحج. حسب مصدر “كود” ما كانش فالوفد الرسمي.

لكن المشكلة هو واخا كيف قالو مقربين منو خلص وكالة اسفار ومشى بشكل خاص للحج كاينة امور كثيرة غريبة. كيفاش خدا الفيزا باش يمشي وشكون عطاه الرخصة. كاين اللي كيتسنى سنوات دورو ووالو. علاش ما مشاش للحج قبل ما يكون وزير.

عضو كان فالوفد الرسمي قال ل”كود” باللي تلاقاوه. يعني كان عندو حج “ڤي اي پي”.

كلشي هنا نقدرو نقبلوه. الغريب هو ان هاد السيد بغى يبان مرضي الوالدين. كانت امو فالحج وديما شاد فيديها. اييه باغي الرضى يمشي قبل واخا كيف قالو صحابو مشى بصفة شخصية راه تهلاو فيه السواعدة.

هادي فضيحة وكون دارها شي وزير من البي جي دي ايام حكومة العثماني كون كلشي هاجمهم وتيرا فيهم.