كود هناء ابو علي ///

البارح خرجنا خبار على يونس السكوري وزير الإدماج الاقتصادي والمقاولة الصغرى والتشغيل والكفاءات. على الحج ديالو مع ماماه. هادوك المستشارين اللي معاه ناضو كيدافعو عليه. كيقولو باللي خلص على راسو الحج وباللي داز على وكالة اسفار.

“كود” جابت معطيات جديدة اليوم من عضو كان فالوفد الرسمي. كان المواطن خلصات عليه الدولة كلشي. استافد من كاع الامتيازات. المواطن اكد ل”كود” باللي كان معاهم يونس السكوري وماماه من نهار وصلو. “كان شاد تيقارو ديما مع امو. باش وصلنا طلبو منا ندعيو بالشفاء لمرا عرفنا من بعد باللي والدتو هي المعنية” يحكي المواطن ل”كود”.

هاد المواطن سمع باللي راه جا مع وكالة اسفار. دابا كيفاش واخا تخلص وكالة اسفار تستافد من كاع امتيازات وفد رسمي. 
مصدر “كود” اكد باللي وهبي عبد اللطيف وزير العدل ورئيس الوفد اللي جا مع مراتو٬ تلاقاو بيه فمرحلة “منى”.

وحسب مصدر “كود” فان السكوري يونس كان معاهم فاوطيل “ابيروا” بالمدينة وفسويس اوطيل فمكة ومشى معاهم فنفس الطيارة ورجع معاهم على نفس الرحلة

دابا خاص السكوري عوض ما يكلف هادوك دياولو يتاصلو بالصحافة يشرح للمغاربة كيفاش ممكن تمشي للحج وانت وزير وتخلي مجلس وزاري ومجلس حكومي وتقول راني خلصت. خاص هاد لوزير الضعيف فخدمتو يعلم لمغاربة كيفاش تخلص شركة خاصة وتولي فوفد رسمي مهليين فيه بزاف. هاد الوفد يقدر يدعي معاك كاع.