كود طنجة ///

البارح لخميس 3 مارس 2025 باذن من النيابة العامة ستامع البوليس للمغني اللي بان فالفيديو مع شباب نهار العيد الصغير كيغني “انا نشرب الطاسة. انا نسكر وننسى” فبلاصة اسمها بير الشفا فطنجة. كاليك باللي فيه تحريض على الفساد وباللي الكلمات ساقطة. طبعا كلشي نسبي. غير صحاب حراس معبد الاخلاق عندهم تبريرات اخرى. 

الشاب اللي غنى كان دار فيديو نهار لاربعا 2 مارس 2025 اعتاذر فيه. قال باللي “الغلط كاين، وأنا كنعتذر، والاعتذار من شيم الرجال”. واضاف “خاصنا نردو البال ملي نبغيو نفرحو فشي بلاصة، نعرفو شنو نغنيو وشنو نقولو، حيت لكل مقام مقال”.

دابا خاصنا نعرفو باللي طنجة وغيرها كانت فيها حفلات. غير هادي ديال طنجة راه ما كانتش مرخصة. فهاد المناسبات السلطات كدير عين الميكا على نشر الفرح. غير فطنجة راه كانت امور اخرى. خرجو الناس بطاولاتهم فحي الجيراري. احتلو الشارع كولو وغالبيتهم من الاسلاميين. دارو الماكلة فالزنقة. فرقو حتى العمرة على شي وحدين. اييه. هادو ما شفناش وكيل الملك يامر بالاستماع ليهم. ما عندهم لا رخصة ولا مولاي بيه. هادو باغيين يديرو دولة فدولة. دابا حگرو غير على هاد الشباب ديال بير الشفاء.

السلطات من الوالي حتى القايد ودوز على العامل والباشا٬ مسؤولين علي هاد التسيب اللي وقع سواء فبير الشفاء او حي الجيراري. خاص كلشي يتابع وناس السلطات يتحاسبو