كود ـ سلا//

تفجرات قضية خطيرة نواحي سلا، بعدما أحالت عناصر الجدارمية ديال المركز الترابي السهول 7 أشخاص على أنظار النيابة العامة المختصة بمحكمة الاستئناف فالرباط، على خلفية ملف كيتعلق بإجهاض قاصر، بعد ما تعرضات للتغرير من طرف شاب فالعشرينات، وحملت منو، قبل ما تسالي العملية داخل عيادة طبيب معروف فالعاصمة الرباط، متخصص فطب النساء والتوليد.

المعطيات المتعلقة بهاد القضية كا تقول أن الأسرة ديال القاصر بلغات الجدارمية والنيابة العامة، الشي اللي خلا السلطات تفتح تحقيق، انتهى بالاستماع لسبعة ديال المشتبه فيهم، من بينهم الطبيب، وكاتبته الخاصة، وممرض خدام فمصحة، ووسيطة كتملك مقهى متنقل بسلا، إضافة للمتهم الرئيسي وجوج من صحابو فالسهول ضواحي سلا.

وخلال تقديم المعنيين بالأمر قدام الوكيل العام للملك، حضرت الضحية القاصر مرفوقة بوالدتها، حيث دار استنطاق تمهيدي شمل الطبيب، والممرض، والكاتبة الخاصة، والوسيطة، وثلاثة متهمين آخرين تم تقديمهم فحالة اعتقال.

وبعد دراسة الملف، قرر الوكيل العام إحالة القضية على قاضي التحقيق لتعميق البحث فالتهم الثقيلة الموجهة للمتابعين، واللي كتهم التغرير بقاصر، وافتضاض بكارة نتج عنه حمل، ثم الإجهاض غير القانوني، والمشاركة فهاد الأفعال كل حسب المنسوب ليه.

ومن جهتو، قرر قاضي التحقيق إيداع المتهم الرئيسي السجن ومتابعتو فحالة اعتقال، بينما تقرر متابعة الستة الآخرين فحالة سراح، من بينهم الطبيب صاحب العيادة اللي دارت فيها عملية الإجهاض، مقابل كفالة مالية حددات فمليون سنتيم، إلى جانب الممرض، والكاتبة الخاصة، والوسيطة، وجوج من أصدقاء المتهم الرئيسي.