وكالات //
عتقو المحامين ديال جوني ديب، الموكل ديالهم، من قضية أخرى فالمحكمة، بعدما دعاه واحد الشخص خدم معاه ففيلم “City of lies” ف2018.
وقدرو المحامين ديال ديب يتفاهمو مع هاداك اللي دعاه مقابل ياخد فلوس، لكن مزال مامعروفش شحال خدا مول الدعوى فهاد لافير.
مدير البلاصة اللي كان فيها تورناج الفيلم المذكور، كَريكَ روكي بروكس، اتاهم ديب بللي عايرو وضربو مباشرة مللي قاليه بللي كاينة عدد من الإجراءات والقيود كيخصو يلتازم بيها فبلاصة التورناج.
واتاهم نفس الشخص جوني ديب بللي كان سكران مللي ضربو وبدا كيغوت عليه وكيقولو غادي نخلصك بفلوس صحيحة مقابل هاد العصا اللي عطيتك.
جوني ديب كان كينكر هاد الاتهامات، قبل ما يعتقوه المحامين ديالو، ويلقاو حل باش يسدو هاد لافير، خصوصا أن جوني يالاه تقريبا “سالا” قضيتو مع طليقتو أمبر هيرد.
