كود احمد الطيب كازا ///

انهيار عمارة البارح 23 ماي 2024 فكازا حدا جامع الحسن الثاني وعمالة انفا كان سباب اصلاحات. شي لعابة قدام مفارضين كانو كيوجدو يديرو ريسطو. غير ريحة الفساد والرشوة باينة. قبل ما ندخلو فالتفاصيل٬ علمت “كود” باللي لحد الان تشدو 3. تشدو اللي كانو كيديرو الاصلاحات واللي فيهم كوارية قدام. النيابة العامة كانت فتحات بحث البارح. سكان العمارة اللي فيها 5 ايطاج غاديين يدخلو طرف مدني فالقضية. مشات ديورهم. اي هادو مالين الفعلة غاديين يتابعو جنائيا ومدنيا. 

غير هاد القضية كتخلص الفساد والرشوة فالبلاد. اولا الطابق الارضي اللي كانو هاد لكوارية كراوها باش يرجعوها ريسطو وضربو الساس كولو٬ ما كراوهاش من عند مول الملك بل من عند شي حد اسمو “الظلمي” اللي كاريها من عند مولاها اللي ساكن فمراكش٬ اي انو السيد كاري وكيعاود يكريها. دابا كيفاش تقدم بطلب الاصلاحات وشكون عطاها ليه بلا خبار مول الملك. 

ثم فقضية المراقبة. واش لمقدم ما فراسو والو ؟ مستحيل. كيفاش خدمو هاد الاصلاحات وضربو الساس بلا مراقبة. السلطات المكلفة بالمراقبة فين هي. هادي راها قريبة لعمالة انفا. بعيدة عليها بشي مائة متر صافي. فين المصالح المختصة. 

اللي كيعطي الاصلاحات هي الجماعة ديال سيدي بليوط. واش دارت خدمتها. 

القضية باينة دارت رشوة وفساد وسد العين وعطات هاد لفضيحة. المحاكمة غادية تفضح كلشي. غادية تخلي كل واحد يخلص تقصيرو

رئيس الدولة الملك محمد السادس البارح داز فالعشية قريب من هاد لبلاصة. يمكن هاد الشي يسرع اكثر فالتحقيق ويخلي كل واحد دار شي تقصير يخلص