كود سعيد الشاوي ///

تخيلوا معي مجموعة كتهز الباليزات دالمسافرين ولات كتحكم فاقتصاد واعصاب بلاد. هاد الشي ماشي فالموزمبيق. هاد الشي عندنا فالمغرب. مدير مكتب المطارات بالمغرب محمد زهير العوفير فاشل باش يحل المشكل. يديه مكتفين فموضوع بحال هادا. يديه مكتفين امام هاد المجموعة اللي محكمة فبلاد. اللي زغبو الله ووصل لمطار محمد الخامس غادي يتعذب. اللي كيهزو لبالز دايرين اضراب. من حقهم ولكن اللي ماشي معقول هو هاد المدير اش كيدير.

فالصيف اللي السياحة محركة هو موقف الحركة فالمطار. اللي عندو الزهر ووصلاتو باليزتو خاصو يقلبها يشوف ايلى ناقصاه شي حاجة.

انا نعاود ليكم تجربة عشتها. انا مسافر جاي من نواكشوط على الخطوط الملكية المغربية. وصلت لمطار محمد الخامس. مشاو يتسلمو الركاب باليزاتهم. قبل ما يدور الرولو اللي كيتحطو فيه طل واحد من الحمالة من مكان دخول هاد الباليزات٬ وسولنا: “شكون اللي بغى باليزتو يقول لي كيفاش دايرة ونحضرها ليه”. حسيت براسي بحال ايلى فشي محطة الكيران فشي دولة افريقية عايشة على القرون اللي قاتت. اواه واش هاد الشي كيوقع فمغرب 2019. كيوقع فاكبر مطار للمملكة. كيوقع فبلاد دايرة سياسة باش يولي مطارها نقطة ربط بين العالم وبين افريقيا. طبعا هاد الحمال كيطلب المقابل على كل باليزة. فين الاضراب فين الادارة فين لارام حقاش هادو زبناء ديالها.

لفضيحة ان هاد الشي وقع فالمحطة اللي يالله دشنها الملك محمد السادس. يا لمزوق من برا اش خبارك من الداخل. هادا مدير المطارات واش كيضحك على ملك البلاد. واش كذب عليه وقدم ليه محطة بخدمات متخلفة بحال هادي.

اللي دور مع الحمال وتحرك وزغبو الله ومشى للطواليت. هاديك قصة اخرى. كيقلى اللي مكلفات بيها كيهدرو بصوت عالي على حياتهم. الواحد يالله نازل راسو مزنزن بالطيارة كيسمع قصة هاد السيدات. كيمكلموها بديك النظرة اللي كتطلب من كل واحد دخل يدور معاهم. بلعاني ما كيكونش كلينيكس فالتواليط باش هما يعطيوه ليك. بحال ايلى دايرين فيك حسنة. مرحاض عمومي فمطار كيعطي صورة علي بلاد. خاصك تخلص او كيحرجوك بتصرفهم.

اعتاديت نمشي من هاد المطار وكنعرف كاع مرافقو الرحلة كنت فالدرجة الاولى فرحلة داخلية هادي اسبوع. تلك قصة اخرى. الخدمات شوهة. اللي مكلفين بخدمة الزبناء دون المستوى فغالبيتهم. كيتكلمو بصوت عالي. ممكن تكون مسافر وتعرف قصتهم. حشومة. مشكلة اخرى ديال امثالي اللي كيجيو من الداخلة والعيون وهي خاصنا ندوزو على الديوانة. اييه ما كيقلبوكش ولكن باش دوز من بلاصة بحالك بحال صحاب الرحلات الدولية حشومة. واش هاد العيون كتعتابرها فدولة اخرى ولا كيفاش يا السي زهير باطرون المطارات.

خاص عينة خاصة من المدراء كيبغيو بلادهم. كيقولو الحقيقة لرئيس الدولة. واقفين على شغلهم.