كود الرباط احمد الطيب ///

اليوم الجمعة 4 نونبر بمقر وزارة الداخلية كاين اجتماع كيجمع هاد الوزارة مع والي جهة كازا وعمال مقاطعاتها وتوفيق بنعلي مدير الوكالة الحضرية. الاستثمار غادي يكون اهم موضوع بعد خطاب سيدنا الاخير فافتتاح البرلمان قبل اسبوعين وشوية.

الاستثمار فكازا موقف خاصة فالعقار. الطاشرونات والمستثمرين كيحملو المسؤولية للوكالة الحضرية “ما عليهش شي شبهة رشوى ولكن موقف كلشي. كلشي كلشي باستثناءات” كيقول منعش عقاري كازاوي ل”كود”.

لكن تقريبا كاع طاشرونات كازا ما كيتسناو والو من هاد الاجتماع “واش كاين كثر من خطاب سيدنا على الاستثمار واللي جا فالبرنامج الحكومي وخطابات رئيس الحكومة وحتى دوريات وزارة الداخلية وكلها كتهدر على الاستثمار وهاد السي مدير الوكالة الحضرية موقف كلشي وباقي فبلاصتو” يضيف منعش اخر ل”كود” اللي كيشدد “اسيدي طبقو القانون مزيان ولكن يتحرك القطاع”

حسب معطيات “كود” فواخا بنعلي موقف الحركة فعندو شي حد اسمو إ م صحابو بزاف وديما يتغدى معاه فمطعم قريب المسيرة وكيتعشاو ف”سينادور” فالعنق فكازا طبعا٬ هادا خدام بيه. الدليل ان شي طاشرون اسمو الصادقي بنى ليه شي فيلا فاعلة تاركة فالمدينة الخضرا كان عطاها ليه طاشرون اخر اسمو بوزوبع.

هاد إ م كيدير وسيط لبنعلي وحسب ما يروج فالوكالة الحضرية فالسي المدير كيقول ليهم باللي يقدر يكون كاتب دولة فالداخلية الى جا التعديل الحكومي وباللي هاد الوسيط هو اللي غادي يكون مدير ديوانو. اللي بغى غراضو يتقضى يقصدو.

كلام كيروجو بحال ديك راني باغي نمشي فحالي. قبل ما يمشي خاصو يتحاسب. يوقف حركة المدينة فالعقار خاصو حساب كبير بحالو بحال اللي وقع للضريس فتمارة. السيد معول على منصب اكبر علاش على زينة خدمتك فهاد المدينة.