احمد الطيب – كود ///
كاينة مشاكل كبيرة فالمكتب الوطني للكهرباء والماء الصالح للشرب. مكتب كان فمستوى مزيان ايام يونس معمر وتكرفص بزاف مع الحافيظي المدير الحالي.
هاد المشاكل او لفضايح عندها تجلياتها وكانت تقارير دولية فضحاتها. فتقرير سابق للبنك الدولي هدر على وجود 34 بالمائة من الانتاج كيضيع كيتهدر. تصورو ثلث الانتاج كيمشي فشبكة التوزيع اي كيمشي واخا كيتنتج. خسارة للدولة فهاد الظروف اللي الطاقة عندها قيمة كبيرة. المسؤول على ضياع اي نسبة هي الادارة الحالية.
رئيس الدولة ف2009 حدد فخطاب ليك التوجهات الكبرى للدولة فهاد الاتجاه. تكلم على سعي المغرب للطاقات المتجددة وضرورة استعمالها. يعني هاد الخطاب ضد الوضعية الحالية. شكون يتحاسب على هاد الفشل؟ طبعا المسؤول المدير العام. دابا راه الكلفة غالية بزاف لانتاج الطاقة مع هاد الجفاف.
من تجليات الوضعية الغريبة اللي كيضر المكتب الوطني للكهرباء والماء الصالح للشرب مشكلة الموارد البشرية. ما بقاوش اطر كافيين يديرو الخدمة ديالهم وهادوك اللي باقيين على قلتهم فيهم شي وحدين مقابلين لفلوس. فحسب مصادر “كود” كاينة 38 مقاولة غير فجهة بني ملال مالينها بطريقة مباشرة او غير مباشرة ناس المكتب الوطني للكهرباء والماء الصالح للشرب. تصورو جهة وحدة فيها هاد العدد. اش غادي يكون فباقي الجهات 11 للمملكة.
اذن هاد الادارة فاشلة فتدبير الموارد البشرية. كاين خصاص كبير٬ فمثلا واحد كيتحكم فشي حالات ف6 الى 7 اقاليم وكاين شخص واحد عندو صفقات كتفوق 5 مليار. يستحيل يخدمها بوحدو. يستحيل تكون الفعالية. حسب خبراء المكتب ل”كود” فخاص ضروري “اعادة النظر فشبكات التوزيع عن طريق يجيبو متخصصين جداد للمكتب. غير فهاد الشي كيبان خطاب رئيس الدولة وتوجهاتو فجهة وتوجهات المكتب الوطني للكهرباء والماء الصالح للشرب فجهة اخرى.
ياك هاد الادارة كان خاصها ف1 يناير 2022 يبدا قانون احداث 12 جهة للتوزيع. علاش ما خرج والو. علاش ما طبق والو. فهادي راه الحافيظي هو المسؤول.
كاع خبراء الطاقة كيقولو باللي الدولة دايرة مجهودات كبيرة بل جبارة ولكن فالتوزيع خاص الية القرب تخرج للوجود. خاص غير يطبقو اللي كان خاصو يبدا.
هاد الشي بلا ما نهدرو على تداعيات هاد المشاكل خاصة قلة العنصر البشري على الاستثمار. بلا ما نهدرو علي الشفرة ديال الضو فشي مناطق فالمغرب. بزاف الضياع. كاين منعشين كيرسلو رسالة للمكتب على حساب مشاريعهم وما يجيهم جواب الا بعد اشهر.
يعني هاد المكتب كيف لخصها خبير ل”كود” “عوض ما يكون عجلة للتنمية ولى عائق ضد التنمية”.
هادي ماخاصهاش تغيير مسؤولي المكتب خاص بناء على تقارير افتحاص ودراسات يعطيو لكل واحد حقو. اللي تسبب فهاد لفضايح يتحاسب.