الرئيسية > آراء > فضايح بوريطة: بلاغ متناقض. المواجهة مع المانيا. تدبير الملف الليبي
19/01/2020 13:00 آراء

فضايح بوريطة: بلاغ متناقض. المواجهة مع المانيا. تدبير الملف الليبي

فضايح بوريطة: بلاغ متناقض. المواجهة مع المانيا. تدبير الملف الليبي

كود احمد الطيب ////

بيان وزارة الخارجية والتعاون البارح على اقصاء المغرب من مفاوضات برلين حول مستقبل ليبيا فيه كتبان محدودية الموظف كاره النساء اللي عندهم شخصية ناصر بوريطة. اولا من حيث التوقيت. السيد داها فتفاهات بسيطة وصفى حساباتو بطريقة وضيعة مع موظفة فالخارجية ونسى باللي 19 يناير هو موعد هاد المؤتمر. هادا مدة طويلة وهي معروفة.

البلاغ فيه هواية وتسرع ما مفروضش يكون عند الديبلوماسيين. شوفو غير التناقض. كيفاش المغرب يؤكد عن استغرابه من عدم دعوة المغرب للمؤتمر من جهة ثم كيضرب فمصداقيتو باش تساءل شرعية تدخل ألمانيا و هي بعيدة جغرافيا و تيقول استعمال النزاع كاداة لمصالح وطنية ؟!!!

دابا كيفاش باغي تحضر لمؤتمر وفنفس الوقت كتقول ما عندو مصداقية. تنتقد عدم الدعوة لمؤتمر تشكك فنجاحو. شرح لينا يا السي الفاهيم.

ثم هاد المؤتمرات راها خدمة حقيقية للديبلوماسية. انت يا المغرب ما عارفش اش باغي. ياك كتقول تدعم الشرعية. تدعم حكومة الوفاق الليبية وعلاش هاد الحكومة ما دافعاتش على مشاركتك. عرفتي علاش؟ انتا يا السي بوريطة هادي سيمانا قلتي فالداخلة فتدشين شي قنصلية افريقية تماك ان المغرب لن يتدخل في الشأن الليبي و انه يحترم إرادة الليبيين. وباش هاد الليبيون طلبو تركيا تجي عندهم عسكريا ناضت الحكومة المغربية كتهدر على رفض هاد الشي. وشد غير طريق. شفتو التناقض عاود ثاني.

نرجعو لاتفاق الصخيرات اللي ديما كتقول باللي هو المرجع الوحيد لكاع اللي طرا فليبيا فاتجاه السلم. هاد الاتفاق دارتو الامم المتحدة. المغرب كان غير ارض وصافي. الدليل هو انك كديبلوماسية ما عمرك درتي شي جهود لاستثمارو دوليا. انت يا المغرب يا الديبلوماسية باغيين تعطيو صورة حنا غير مستقبلين وباش توقع شي حاجة بحال مؤتمر برلين كتقول “اه نسيتونا”. وشد طريق وحدةثم انت يا بوريطة خليتي الجزائر كتروج باللي اطروحة ان دول الجوار وحدها، أي تونس و الجزائر و مصر هي المعنية الأولى بالنزاع. عمرك تكلمتي عمرك رديتي على هاد الشي.

نقطة اخرى فيها ضبابية كبيرة. انت يا بوريطة كتقول باللي مع الشرعية اي مع السراج حتى قررات تركيا تدخل عسكريا عاد بديتي تلعب. الرباط استقبلات شخص قدم راسو وزير خارجية حفتر.

انت قطعتي الطريق مع دول كانت شقيقة بحال الامارات وشوية السعودية علي قبال ليبيا اللي دعمات الجنيرال حفتر وانت دعمتي الجهة الاخرى وباش دخل طرف اخر تلفتي واستقبلتي ناس حفتر فالرباط. يتلاقاو مع كبار مسؤولي الدولة وما اللا ماشي هو المشكل. الاساسي انوكان فالرباط غير هادي ايام.

وفالاخير مالنا ومال المانيا. واش قاد عليها. ياكما باغي تفعفعها حتى انت كيف فعفع مزوار السويد قبلك؟ المانيا بعيدة علاقاتنا معاها مزيان. شافتك يا بوريطة غير صالح لمؤتمر ليبيا ما عرضاتش عليه. شافت تناقضاتك. شافت ضعفك ما بغاتش تعرض عليك. اذن مسؤولتيك كبيرة فهاد الشي. أسئلة عديدة بل تلقى جواب مضعيف جدا استراتيجية خلق الأزمات لن تنتفع في مجاراة التحولات الجيواستراتيجية الهامة التي تعرفها المنطقة.

المنطقة فيها لعب كبير ديال دول كبيرة ومصالح كبيرة بزاف ملعوبة فليبيا. المغرب امنو مهدد فهاد اللعب. ولكن خاص يكون عندك شي حد صحيح يدافع عليك ماشي واحد اسبوع وهو مضارب مع تفاصيل تافهة. كيطرد اللي يقدر يقول ليه اللا.

موضوعات أخرى