كود ـ سبور//

عبّر فصيل “وينرز” المساند لنادي الوداد الرياضي عن غضبه الكبير من الوضعية ديال الفريق، وخصوصًا النتائج الأخيرة اللي وصفها بـ”الإهانة لتاريخ النادي”.

فواحد البلاغ شديد اللهجة، هاجم الفصيل الإدارة، والطاقم التقني، وحتى بعض اللاعبين، وحمّلهم كامل المسؤولية فالتراجع ديال الفريق اللي ما كيشرفش مكانة وتاريخ وداد الأمة.

هزيمة قاسية داخل الميدان

الغضب ديال “الوينرز” تزاد من بعد الهزيمة الثقيلة اللي تعرض ليها الفريق داخل الميدان بنتيجة (4-1)، اللي اعتابروها “كارثية وغير مقبولة”، واعتبروها وحدة من أسوأ النتائج فتاريخ النادي على الصعيد المحلي. بالنسبة للفصيل، نادي بحجم الوداد اللي ديما كيلعب على الألقاب ماشي معقول يطيح فبحال هاد النتائج، خصوصًا قدام جمهوره.

انتقادات لاذعة للإدارة

فصيل “الوينرز” حمل المسؤولية الأكبر لإدارة النادي، وخصوصًا الرئيس، اللي كيعتبروه ما قادرش يتحمل المسؤولية ديالو. الرسالة كانت واضحة: “الوداد الرياضي محتاج رئيس قوي عندو شخصية كتعكس قوة النادي، ماشي خطابات إعلامية خاوية وما كتجيب والو”. وطالب الفصيل الإدارة بخدمة حقيقية لإعادة بناء الفريق بدل التهاون والاستمرار فالأخطاء.

اختيارات الطاقم التقني محل انتقاد

الطاقم التقني ما تسلمش من الانتقادات، بحيث “الوينرز” شافو أن الاختيارات التكتيكية والبشرية ضعيفة وما كتناسبش طبيعة البطولة الوطنية. هادشي، بالإضافة لعدم اتخاذ قرارات تصحيحية، خلى الفريق يبعد بـ15 نقطة على الصدارة فوسط الموسم فقط، وهو ما كيعتبروه مؤشر خطير على الفشل التقني.

اللاعبين: بين التسيب والتخاذل

البلاغ ديال “الوينرز” وجه انتقادات حادة لبعض اللاعبين، اللي وصفهم بـ”الكسالى” واللي ما كيقدروش قيمة القميص الأحمر. الفصيل استنكر السلوكات ديال بعض اللاعبين، بحال الحصول على إنذارات مجانية، التصريحات المستفزة، وحتى عدم الاعتذار على الأخطاء. “القميص الأحمر ديال الوداد أكبر من أي لاعب كيتهاون أو كيتعامل بعدم جدية”، حسب البلاغ.

مطالب بالتغيير السريع

“الوينرز” كيطالبو بتغييرات فورية لإنقاذ الموسم، خصوصًا مع قرب فترة الانتقالات الشتوية. وأكد الفصيل على أن سياسة الترقيع اللي كتبعها الإدارة والطاقم التقني ما كتليقش بفريق بحجم الوداد. ودارو التأكيد على ضرورة انتداب لاعبين بجودة عالية ومستعدين يدافعو على القميص بشراسة، مع فرض الانضباط فالفريق ومعاقبة أي واحد كيسيء للنادي.

رسالة تحذيرية للإدارة

فآخر البلاغ، “الوينرز” وجّهو تحذير واضح للإدارة والطاقم التقني: “إما تتحملو المسؤولية وتصلحو الوضع، وإما خليو بلاصتكم لناس قادرة ترجع الوداد لمكانتو”. الفصيل كيشدد على أن مصلحة النادي فوق أي اعتبارات شخصية، وأنهم غادي يستمرو فالضغط حتى يرجع الفريق لمستواه الطبيعي.

فصيل “الوينرز” كيشوف أن الوضعية الحالية ما كتليقش بنادي بحجم الوداد الرياضي، وأن الفريق محتاج لإصلاحات مستعجلة باش يرجع للمنافسة على الألقاب. الرسالة واضحة: خاص تغيير جذري وخدمة حقيقية من الجميع، من الإدارة وحتى اللاعبين، لإنقاذ الموسم وإعادة الفريق للطريق الصحيح، ونبهوا ايضاً الناس اللي باغيا تستغل الوضع في صراعاتها الشخصية ومصالحها الخاصة.