كود الرباط//
كشف مصدر مطلع لكود أن نبيل بن عبد الله، الأمين العام لحزب التقدم والاشتراكية وقف التنسيق مع حزب الاتحاد الاشتراكي بسبب الخرجات غير المحسوبة لادريس لشكر وحبه المفرط للظهور دون مراعاة للتنسيق مع الرفاق في حزب الكتاب.
ادريس لشكر، واللي سبق حرج المعارضة بالإعلان عن تقديم ملتمس الرقابة ضد الحكومة قبل أن يتم الحسم فيه، عاود خرج ثاني وهدر الأسبوع الماضي، على ضرورة الانتقال من الاقتراع باللائحة للاقتراع الفردي.
بحسب مصدر كود، هاد النقطة كانت محل نقاش بين حزب الاتحاد الاشتراكي والتقدم والاشتراكية، لكن لم يتم الحسم فيها بعد، إلا أن لشكر أعلنها لوحده ونسبها لراسو.
الاكثر من ذلك، فإن هاد النقطة كانت ضمن وثيقة مشتركة تعدها لجنة مشتركة بين الحزبين، وهي اللجنة اللي وقفها لشكر بشكل انفرادي، بعد فشله في إقناع المعارضة بملتمس الرقابة ودون الرجوع للمكتب السياسي للحزب اللي مجمدة الاجتماعات ديالو منذ رمضان.
هاد الخرجات ديال لشكر قلقات الرفاق في حزب الكتاب، اللي كيرفضو يكونو مجرد عربة يسوقها لشكر، وقرروا يوقفو التنسيق معه، لأن التنسيق تيتطلب نوع من النضج، الذي يفتقده لشكر في خرجاته.
رفاق بن عبد الله رفضو يتورطو في فخ ملتمس الرقابة اللي كان لشكر باغي يستعملو فقط كأداة للتفاوض والضغط من أجل الدخول للحكومة، لكن رغم ذلك بقي بن عبد الله محافظ على التنسيق مع لشكر، وهو ما جلب عليه غضب رفاقه، اللي دارو ليه شبه محاكمة في احد اجتماعات المكتب السياسي، وطلبو منو يوقف هاد التنسيق. قبل ان يقتنع مؤخرا بعدم جدوى التنسيق مع لشكر
مسألة أخرى، علاش لشكر باغي يرجع للفردي بدل اللائحة.
الجواب، بحسب البعض أن لشكر باغي يزيد يتحكم في التزكيات ويعطيها لمالين الشكارة، اللي قادين يخلصوا.
دبا للي كستافد من هاد الفشل فالتحالف بين نبيل ولشكر هو البي جي دي والمحافظين مع اقتراب مناقشة تعديلات مدونة الأسرة فالبرلمان، وكذا القانون الجنائي.
