كود الرباط //

غايكون رئيس الحكومة، عزيز أخنوش، حاضر يوم الاثنين 12 ماي فالجلسة الشهرية لمساءلة رئيس الحكومة بمجلس النواب، والموضوع هاد المرة هو “إصلاح التعليم: من مدرسة الريادة إلى جامعة التميز‘‘.

حضور أخنوش فالبرلمان جا فواحد السياق سياسي شاعل، خصوصا بعد انتخاب عبد الإله بنكيران لقيادة حزب العدالة والتنمية، والكلاشات لي دار بنكيران للحكومة والهجوم الشخصي على أخنوش.  حيث من المتوقع يكونو مساجات تحت الدف فهاد الجلسة ديال المساءلة الشهرية.

مصادر برلمانية قالت إن الجلسة غادي تكون فرصة لمساءلة أخنوش على حصيلة برنامج ’’مدارس الريادة”، وأيضا على وضعية الجامعات العمومية، ومدى ملاءمتها مع سوق الشغل، وشنو  الرؤية ديال الحكومة لتطوير التعليم العالي في سياق الثورة الرقمية لي كاينا وعلاقتها بالذكاء الاصطناعي.

المعارضة بدات توجد لكلاشات سياسية قوية، خصوصا محمد أوزين أمين عام الحركة الشعبية لي عوال يدير كلمة قوية، وبرلمانيين من البي جي دي والاتحاد الاشتراكي، اللي ناويين كيف ديما يوجهو اتهامات للحكومة بالفشل فالتدبير، وتكريس الفوارق فالتعليم، خصوصا ما بين العالم القروي والحضري.

بالمقابل، من المتوقع أن يدافع أخنوش على برنامج حكومتو، ويقدم معطيات على تمويل وتوسيع مدارس الريادة والنجاحات للي تحققت.. ومخططات جديدة لتطوير البنية الجامعية، خصوصا فالميادين الرقمية والمهن الجديدة.