كود كازا//
فرنسا عبرات، فبيان رسمي خارج من الوزارة الخارجية ديالها، على فرحتها الكبيرة باعتماد مجلس الأمن ديال الأمم المتحدة القرار رقم 2756 (2024) اللي كيجدد مهمة بعثة الأمم المتحدة للاستفتاء فالصحراء (مينورسو) لعام اخر حتى 31 أكتوبر 2026. البيان وصف القرار بأنه “كيحل صفحة جديدة” فالنزاع اللي دام 50 عام، وكرر دعم فرنسا لمخطط الحكم الذاتي تحت السيادة المغربية كحل “أكثر واقعية”، وأكدت حضورها المؤيد فالتصويت بـ12 صوت إيجابي، مقابل امتناع روسيا والصين وباكستان، والموزمبيق انما الجزائر فماشاركاتش.
فرنسا دعات جميع الأطراف المعنية – المغرب، جبهة البوليساريو، الجزائر، وموريتانيا – باش يدخلو فمفاوضات معقولة تحت إشراف المبعوث الشخصي للأمين العام، ستافان دي ميستورا، “بلا شروط مسبقة”، باش يتوصلو لحل سياسي عادل ودايم يحافظ على الاستقرار فالمنطقة. البيان أكد أن “القرار كيوازن بين الأطراف” وكيهتم بمبادئ الحل السياسي الواقعي، وذكر أن فرنسا غادي تبقى كتشجع المجهودات الدبلوماسية وتعزز الثقة بين الأطراف، وحتى تشجيع الاستثمارات الاقتصادية فالأقاليم الجنوبية كطريقة للتنمية والسلام.
الترحيب الفرنسي جا فإطار دعم فرنسا التاريخي للمغرب، حيتاش علنات باريس فيوليو 2024 رسميًا الاعتراف بسيادة المغرب على الصحراء ، وهادشي كيزيد يقوي علاقتها مع المغرب كحليف استراتيجي رئيسي فمجلس الأمن. تقارير دبلوماسية كتشير أن فرنسا ساهمت فصياغة نص القرار النهائي، وعارضت أي إضافات على حقوق الإنسان اللي ممكن تعتبر “عائق فالمفاوضات”، ودعات لتقرير استراتيجي من الأمين العام أنطونيو غوتيريش غستة أشهر باش يقيْم مستقبل المهمة على أساس تقدم الحوارات. هاد الموقف متوافق مع دعم فرنسا السابق لمبادرة الحكم الذاتي اللي كتشوفها “حل واقعي” كيخدم الاستقرار فشمال إفريقيا.
