كود – وكالات//

قررات المحكمة الجنائية فباريس نهار الجمعة 6 مارس 2026 تحاكم الداعية الإسلامي طارق رمضان غيابياً، حيث ما حضرش لجلسات المحاكمة ديالو فالقضية لي متهم فيها بالاغتصاب. المحكمة حتى هي صدّرات فحقو مذكرة اعتقال. ومنين تعلن القرار، المحاميين ديالو خرجو من قاعة المحكمة.

بدأت المحاكمة ديال طارق رمضان، لي عمرو 63 عام، نهار الاثنين 2 مارس 2026 فباريس ،ولكن ما حضرش للجلسة حيث كان قبل بيومين دخل للسبيطار فمدينة جنيف فسويسرا، محامين قالو باللي السبب هو تدهور الحالة الصحية ديالو بسبب مرض التصلب المتعدد.

رسالة طبية من واحد الطبيب ديال طارق رمضان، قدمها فريق الدفاع ديالو، قالت باللي المريض ديالو عيان بزاف وما قادرش يتحمل، ونصحو ياخذ راحة بين نهار وعشرة أيام قبل ما يمشي  قدام المحكمة.

ولكن رئيسة المحكمة، القاضية كورين غوتزمان، قررات يدوز فحص طبي عند جوج أطباء مختصين فالأعصاب باش يتأكدوا من الحالة الصحية ديالو، ويشوفو واش خاص المحاكمة تأجل ولا لا حسب الطلب ديال الدفاع.

فالتقرير لي تقرا فالمحكمة، قالو الأطبا باللي مرض التصلب المتعدد لي كيعاني منو طارق رمضان من هادي سنوات مستقر، وما كاين حتى دليل على شي تدهور جديد فالحالة الصحية ديالو.

وبسبب هاد المعطيات، تقرر تكمل المحاكمة فغيابو، وتخرج  مذكرة توقيف فحقو.

https://www.rfi.fr/fr/france/20260306-france-tariq-ramadan-sera-jug%C3%A9-par-d%C3%A9faut-%C3%A0-son-proc%C3%A8s-pour-viols-un-mandat-d-arr%C3%AAt-d%C3%A9livr%C3%A9-%C3%A0-son-encontre