گود سبور//
سلط الاتحاد الفرنسي لكرة القدم عقوبة قاسية على المغربي مهدي بنعطية المدير الرياضي لأولمبيك مارسليا الفرنسي، بسبب واقعة الطرد اللي تلقاه خلال ماتش الفريق ضد ليل ضمن منافسات كاس فرنسا، وهذا الشي حسب جريدة ليكيب الفرنسية.
وكشقت شبكة “RMC” الفرنسية، أن الاتحاد الفرنسي لكرة القدم، قرر معاقبة مهدي بنعطية ووقفوه لمدة 3 اشهر نافذة و 3 اشهر موقوفة التنفيذ بسبب السلوك ديالو فماتش أولمبيك مارسليا وليل يوم 14 يناير الماضي، ضمن منافسات دور الـ32 من كاس فرنسا.
وطرد حكم المباراة، المهدي بنعطية خلال اللحظات الأخيرة من المباراة اللي سالا الوقت الأصلي ديالها بنتيجة التعادل الإيجابي 1-1، ومشاو الفريقين إلى ضربات الترجيح اللي عرفت تأهل ليل بعد الفوز على مارسليا بنتيجة 4-3.
وخرج المهدي بنعطية بعد نهاية الماتش، بتصريحات قوية احتج من خلالها على قرارات الحكم، وقال فهاد التصريحات اللي تناقلتها وسائل إعلام فرنسية نقلا عن شبكة bein sports: “هذا الشي اللي عشتو خطير، طلبت من الحكم الرابع باش يقول لحكم الساحة انه كاين بيلانتي لمصلحة جوناثان رو لاعب مارسليا، ولكن قال بلي أنا هددتو.. جيبو الصور نشوفوها”.
وكمل بنعطية وقال: “تدخلت باش نفك المدرب ديالنا ورئيس ليل، وهو يعطيني حكم الساحة الحمرا بعدما هضر معه الحكم الرابع، وقاليا نعتي ليا بصبعك وهددتيني، علاش ما كايخليونيش نهضر كانحس براسي مخنوق واش ما عنديش الحق ندافع على الفريق ديالي ؟ باش كايتميزو الآخرين عليا أنا ؟ “.
