كود سبور//

غاتستافد فرق البطولة الوطنية مزيان من دخول شركة الطيران الإيرلندية RYANAIR لسوق الرحلات الجوية الداخلية بالمغرب، وتوفيرها النقل الجوي بين عدد من المدن المغربية وفوقت قصير، وهذا الشي غيرجع على الأندية ديال البطولة سوا فالقسم الأول والثاني او حتى الهواة بالفائدة.

ودشن فريق الاتحاد الإسلامي الوجدي الممارس فالقسم الوطني الثاني، رحلات الأندية المغربية الداخلية على خطوط شركة RYANAIR الإيرلندية، برحلة خداها من مطار وجدة إلى مطار أكادير، باش يلعب مع حسنية أكادير ثمن نهائي كأس العرش، وهذا الشي خلاه يستفاد من ثمن الرحلة ديال الشركة المعروفة أنها رخيصة مقارنة برحلات الشركات الأخرى، ووفر عليه الوقت ديال الرحلة الطويلة بين وجدة وأكادير فالكار، وحتى العيا ديال اللاعبين، حيث أغلب الأندية كيتنقلو فالكار باش يلعبو بين المدن المغربية باستثناء الفرق الميسورة فالقسم الأول، وبسبب تكلفة الرحلات الجوية ديال لارام، وهذا الشي كيأثر على اللاعبين بدنيا وعلى مردودهم ومستواهم التقني فالماتشات، وكيتسناو حتى يكون الطراجي بين كازا وطنجة باش ياخدو البراق، من غير هذا الشي فأغلب الفرق كيمشيو فالكار.

واذا دارت الفرق الوطنية الأخرى بحال الاتحاد الإسلامي الوجدي، وبدات كديبلاصا فطيارات شركة RYANAIR مع رجوع البطولة الاحترافية اللي موقفة على قبل كاس العرش، فهاد الشي غايشعل المنافسة مع لارام، وحسب المنطق غيخلي الأندية تستافد من عروض مزيانة باش ديبلاصا فالطيارة وبثمن مزيان وتوفر الوقت واللاعبين ديالها ما يعياوش.