كود الرباط//
فريق ’’الاتحاد الرياضي يعقوب المنصور” اللي صعد إلى القسم الوطني الأول للمحترفين، دار مؤخرا الجمع العام للفريق، للي تحول لـ”محفل انتخابي” لصالح الأصالة والمعاصرة، ماشي غير حيث وزير الشباب والثقافة والتواصل المهدي بنسعيد مشرف عليه بصفتو رئيس الفريق، لا حتى من حيث الحاضرين فالجمع العام، كلهم عندهم علاقة بالبام.
علاش تحول فريق اتحاد يعقوب المنصور، لفريق كيتحكم فيه حزب “البام” بامتياز وطبعا غايدير به الانتخابات فدائرة يعقوب المنصور لي هي دائرة الموت وفيها عدد كبير من الأصوات. الجواب على علاش، واضح غير من صور الجمع العام الأخير للفريق.
نبداو بأول واحد كيجري الفريق، مجيد خال، الكاتب العام للفريق، يشغل منصب كاتب عام جمعية الأعمال الاجتماعية لوزارة الشباب والثقافة والتواصل. الجمعية بدون مدير من نهار جرا بنسعيد على نعيمة بنيحيى، وبقات بلا منصب، حتى عينها سيدنا وزيرة للأسرة، مما يجعل مجيد خال يمارس السلطة كاملة، في قطاع حساس، ومرتبط بموارد بشرية ومالية كبيرة.

مصادر “كود” تؤكد أن الرجل هو الحارس الشخصي لملفات بنسعيد المرتبطة بالشأن الاجتماعي، ويشرف عملياً على كل ما يتعلق بالجمعيات والمبادرات الشبابية والتمويلات.
الاجتماع حضرته شخصيات لا تمت بصلة لكرة القدم، بل تمثل “شبكة المصالح” المحيطة بالوزير، منهم مثلا رضى بشير مدير ديوان بنسعيد. بعيد عن يعقوب المنصور جغرافيا ومؤسساتياً، لكنه حاضر بقوة في كل صغيرة وكبيرة. الرجل معندوش تاريخ رياضي، لكنه عندو ركيزة قوية داخل الوزارة.
ثاني شخصية حضرت، هو نسيم بلخياط، الملايري وشريك بنسعيد للي حصلو على دعم مالي ضخم لمشروع تصنيع سيارات مغربية (Neo Motors). المشروع روّج له بقوة سنة 2023 و2024، ووُصف بأنه ثورة صناعية، لكن إلى حدود اليوم، لا أرقام رسمية، لا تقارير أنجزت، لا إنتاج واضح، ولا أثر في السوق. لدرجة أنه فالشارع مكتلقاش هاد نوع الطوموبيلات، واش توقف الإنتاج، واش “كذبو” على القصر؟ وفين مصير أموال الدعم؟

من الحاضرين كذلك، عبد الله عيد، مستشار سابق، تم الاستغناء عنه بعد تصرفات متهورة، لكنه عاد من النافذة عبر شركة كتحصل على مارشيات من الوزارة. يُعرف بسلوكياته الغريبة، بما فيها التدخين ف “لايفات” مباشرة، فالوقت لي أول واحد خاص ينخرط فحملات لمحاربة التدخين هو هاد الشاب.

يوسف بريطل، المستشار الثقافي القوي بالوزارة، حضر كذلك، عندو شركة إنتاج، ويُوصف بأنه “الوزير الفعلي للثقافة”. المنتجون المغاربة عارفينو وشركات الإنتاج عارفين قوتو خصوصا فداكشي ديال تراخيص التصوير والدعم.

خامس شخصيات حضرو، جوج ملايرية ولاد الرباط، واحد مستشار وزيرة منتدبة واحد مستشار كاتب دولة، من نفس الحزب. هاد جوج مكيفهموش ف السياسة، وارثين الملاير وبواتهم صحاب الوزراء. المستشار كيكون ديما منصب المناضلين دبا ولى منصب البريستيج وصافي مع وزراء البام.
سادس شخص، هو ولد المحامي زهراش، كيقلب على بلاصتو وغالبا غايمشي مع البام فالانتخابات الجايا ويترشح.
فهاد الفيلم ديال يعقوب المنصور، كيبان خطر الجمع بين السياسة والكرة، حيث ناضت واحد الهوتة مؤخرا فالمغرب، هي أن كولشي باغي يقلد فوزي لقجع.
لللي معارفينش هو أن لقجع بدا من الحمري، شويا بشويا كيطلع الفريق، ماشي بالدوباج وملقاش الفرقة واجدا، ومستعملهاش لأغراض انتخابية أو سياسية. نجح ف بركان كما نجح مع المنتخب.