عمر المزين – كود///

أعلن وزير الداخلية فبلاغ رسمي، توصلات بيه “كود”، عن فتح أجل استدراكي للتسجيل فاللوائح الانتخابية العامة، وهاد الخطوة جات فإطار عملية المراجعة السنوية اللي راه كاتدار دابا.

وحسب البلاغ، فهاد الأجل كيهُم المواطنات والمواطنين اللي مازالين ما مسجلينش فاللوائح، وكيستوفيو الشروط القانونية، خصوصاً اللي عندهم 18 سنة شمسية كاملة أو اللي غادي يوصلو لهاد السن مع متم شهر مارس 2026.

وحدّد البلاغ الفترة ما بين 18 و24 يناير 2026 لاستقبال طلبات التسجيل، سواءً عند مكاتب السلطة الإدارية المحلية القريبة من السكن، أو عبر الموقع الإلكتروني المخصص للوائح الانتخابية العامة.

كما ذكر البلاغ أن المواطنين المسجلين من قبل، يقدرو يتأكدو من بقاء أسمائهم فاللوائح، إما بإرسال رسالة نصية قصيرة فيها رقم البطاقة الوطنية للتعريف إلى 2727، أو عبر الولوج للموقع الإلكتروني الخاص باللوائح الانتخابية العامة.

وبالنسبة للي تشطب على اسمهم من اللوائح الانتخابية بصفة غير قانونية، أكد البلاغ أن من حقهم يتقدمو بشكاية لدى اللجنة الإدارية المختصة خلال نفس الفترة الممتدة من 18 حتى 24 يناير.

وأشار البلاغ إلى أن اللجان الإدارية غادي تعقد اجتماعاتها ما بين 10 و14 فبراير 2026، للبث فطلبات التسجيل الجديدة والشكايات واتخاذ القرارات اللازمة فهاد الشأن