وكالات//

المغنية والممثلة الأمريكية، سيلينا غوميز، شعلات مواقع التواصل بعدما خرجات منها غير زلة صغيرة، وفضحات بلا ما تقصد تفاصيل مهمة على عرسها المرتقب مع المنتج الموسيقي بيني بلانكو.

فواحد الفيديو اللي تحطّ فالحساب الرسمي ديال ماركة التجميل ديالها، قالت سيلينا بشكل عفوي بلي “تايلور سويفت غادي تحضر عرسي”، ولكن المفاجأة كانت فالصيغة اللي استعملات: قالتها فالجمع، وهادشي خلا المعجبين يفسروها أن تايلور غادي تجي مع الراجل ديالها، اللي هو لاعب كرة القدم الأمريكية ترافيس كيلسي، وبهاد الطريقة تكون فضحات أنهم مرتبطين رسميًّا.

هاد الزلّة الصغيرة كانت كافية باش تشعل الإنترنت، خصوصا بين جمهور تايلور (السويفتيز) وجمهور سيلينا، اللي ولّاو كيقلبو على أي تسريب بخصوص العرس: فوقاش وفين.

ورغم أن التاريخ الرسمي ديال العرس مازال ما تعلنش، بعض التقارير قالت أنه غادي يكون فشهر شتنبر فـ”مونتيسيتو” بكاليفورنيا، المنطقة اللي كيحماقو عليها المشاهير، ودارت فيها بزاف ديال الأعراس الكبار.

والمتوقع أن الاحتفالات ديال العرس غادي تبقى لش يّام، وغادي يحضرو فيها ناس كبار من عالم الفن، بحال إد شيران ونجوم مسلسل “Only Murders in the Building” اللي كتشارك فيه سيلينا.

ومن بين التفاصيل اللي شاركاتها سيلينا، قالت أنها ناوية تقدّم لضيوفها “البسكويت مع الصوص” كتحلية، حيث كتحمل معاه ذكريات طفولية، وهو طبق تعلماتو من جدّتها.