كود تيزنيت//
صعود تاريخي حققو فريق أمل تيزنيت للقسم الوطني الثاني، وخلى الفرحة تعم المدينة وسوس كامل، خصوصا أن هاد الإنجاز جا بعد مجهود كبير من مكونات الفريق، ومن الساكنة والمحبين، اللي صابرو وساندو لسنين باش الفرقة توقف على رجليها وتحقق الحلم ديالها.
البرلمانية زينة ادحلي، بنت رجل الأعمال المعروف والفاعل الجمعوي إبراهيم ادحلي، خرجات بتدوينة فايسبوكية عبّرت فيها على الفخر والاعتزاز بهاد الصعود، واعتبراتو “ماشي غير تقدم رياضي، ولكن تعبير على العزيمة ديال ولاد تيزنيت، وعلى العمل الجاد للي داروه اللاعبين والطاقم والجمهور”.
ادحلي وصفات الإنجاز بـ”الحلم الكبير”، اللي غادي يعطي دفعة قوية لكرة القدم فـ سوس، وطالبات بالمزيد من الدعم للمواهب المحلية. وما نساشات تهني حتى باقي الفرق السوسية، بحال أولمبيك الدشيرة اللي كيطمح للصعود للقسم الأول، وحسنية أكادير اللي كيكافح باش يبقى بين الكبار.
وختمات تدوينتها بكلمات فيها بزاف ديال التأثر: “من القلب نردد: ألف مبروك هذا الصعود التاريخي، متمنية لفريق أمل تيزنيت مسيرة موفقة ومليئة بالإنجازات في المراحل القادمة.”
كما عبر عدد من الفاعلين والنشطاء عن فرحتهم العارمة، لهاد الانجاز. سوس اليوم فرحانة، وأمل تيزنيت رجّع الأمل لجمهور عطشان للكرة والنجاحات.
واعلنت صفحة فريق أمل تيزنيت عن تنظيم احتفالية كبرى بالمدينة بعد النجاح للي حققو الفريق والصعود للقسم الثاني.
