كود كازا//

فرحات مهني، رئيس حكومة القبائل فالمنفى، عبّر فواحد التدوينة فموقع “إكس” على دعمو الكبير للمغرب بعد القرار الأخير ديال مجلس الأمن اللي أكّد السيادة الكاملة ديال المملكة على الصحرا. وقال مهني: “المغرب رجع صحراه، و القبائل حتى هي غاتسترجع استقلالها”، وأكد أن المغرب فقد جزء من أراضيه بسبب “قوس استعماري فرنسي”، ولكن دابا استرجعو بفضل القرار الأممي. وهنّأ الملك محمد السادس والمغاربة على هاد “الانتصار التاريخي”.

مهني زاد وأعلن أن “الوقت جا باش القبائل تصحّح نفس الغلط التاريخي”، وكشف أن تاريخ إعلان استقلال منطقة القبائل غادي يكون نهار 14 دجنبر 2025، وقال: “جا الوقت نسدو القوس الاستعماري الفرنسي اللي خلا القبائل تحت سلطة ما كتمثلهاش. عاشت القبائل حرة للأبد.”

هاد التصريح جا فظرف سياسي حساس، وشافو مراقبين بزاف كرسالة قوية للنظام الجزائري، خصوصاً بعدما القرار الأممي اللي دعم مبادرة الحكم الذاتي فالصحراء المغربية وكرّس مغربيتها نهائياً.

تصريحات زعيم حركة “الماك” كتعكس رغبة نشطاء القبائل فالمطالبة بحق تقرير المصير، ومواجهة نظام جزائري كيرفض الاعتراف بمطالبهم، وكيتعامل معاهم كمنظمة “إرهابية انفصالية”. التدوينة كانت طرشة سياسية جديدة للنظام الجزائري ورسالة واضحة بأن زمن الوصاية سالا.