وكالات//

فخطوة لفتات الانتباه وخلقـات البوز فوسائل الإعلام، مشى مغني الراب الأمريكي كانيي ويست لمحكمة فدرالية فمانهاتن نهار الجمعة، وتبع شوية من جلسة محاكمة الفنان شون كومز، اللي معروف بلقب ” ديدي”، واللي متّهم فـقضايا ديال الاتجار الجنسي وتصرفات إجرامية.

ورغم أنه ما قال حتى كلمة رسمية وسط القاعة، الصحافيين شدّوه بكاميراتهم وهو خارج من قاعة قريبة، بعد حوالي عشرين دقيقة من بداية الجلسة، وكان كيتفرج فالمحاكمة ساكت. منين سولاتُو قناة “ABC” واش جا يساند بي ديدي، غمّز براسو وقال غير: “آه”.

وهاد الظهور ديال كانيي ويست جا نهار واحد من بعد ما سالات الشهادة ديال “جين”، اللي كانت شريكة سابقة لبي ديدي، واللي شهدات قدّام هيئة المحلفين وعاودات تفاصيل صادمة، وقالت باللي ديدي كان كيغصبها تدير علاقات جنسية مع رجال آخرين بزّز منها، فإطار ديال تحكّم وسيطرة.

المحاكمة اللي كدور دابا قرابة شهر فمحكمة مانهاتن الفدرالية، سمعو فيها لشهادات ديال ضحايا، اللي هضرو على كيفاش كان بي ديدي كيسيطر عليهم نفسيًا وماديًا، وخصوصًا على المغنية كاسي، اللي كانت معاه فواحد العلاقة دامت أكثر من عشر سنين.

وحسب ما قال الادعاء، بي ديدي متّهم بأنه كان كيجبر نساء يدخلو فـ”ماراثونات جنسية” مع رجال كيبيعو الجنس، وهادشي من بعد ما كيعطيهم مخدرات باش يفقدو السيطرة وما يقدروش يهضرو.