عن “لوماتان” . عثمان الشرقي – كود///

قال مصطفى التراب، الرئيس المدير العام لمجموعة OCP، فحوار مع يومية “لوماتان” أن المهمة الأساسية ديال المجموعة هي “نحييو الفسفاط”، بمعنى نستعملو هاذ الثروة باش نخدمو الأمن الغذائي العالمي ونعطيوها القيمة ديالها الحقيقية للمغرب.

وضح التراب عاوتاني فحوارو مع “لوماتان” أن إفريقيا بالنسبة ليهم ماشي سوق خارجية ولكن دار وعائلة، والرهان الكبير هو تسريع التنمية الفلاحية فالقارة باش تحقق الاكتفاء الغذائي.

وشاف أن التعليم والابتكار هما الركيزة الأساسية، وهادشي خلاهم يأسسو جامعة محمد السادس متعددة التخصصات، اللي كتلعب دور ديال البحث العلمي وتكوين الشباب المغاربة والأفارقة، باش يكون عندهم جيل جديد قادر يرفع التحديات.

وبيّن التراب أن البنوك المغربية وقفات جنب OCP فتمويل المشاريع الكبرى، وهادشي كيبين القوة ديال النظام البنكي الوطني وقدرتو يواكب الاستثمارات الاستراتيجية ديال البلاد.

وأكد أن “النية” قيمة كبيرة فثقافة OCP، حيت كتعني الإخلاص والجرأة وخدمة الصالح العام، وزاد: “الثروة الحقيقية ماشي الفسفاط، ولكن الموارد البشرية”.

وفالمجال الرياضي، قال أن OCP غادي تبقى تدعم ولكن بشكل احترافي أكثر، عبر مبادرة EVO Sport اللي كتخدم على تكوين اللّاعبين والمدربين بشراكة مع الجامعة الملكية لكرة القدم، باش الرياضة تكون عندها استمرارية.

وزاد التراب فقرة مهمة على البيئة، وقال أن OCP بدات برامج قوية فالطاقات المتجددة وتحلية المياه باش تضمن الاستدامة وتحافظ على الموارد الطبيعية، حيث الأمن الغذائي مايمكنش يتحقق بلا أمن مائي وطاقي.

وختم التراب كلامو بأن الرؤية ديال OCP هي تبقى سفير للمغرب فالعالم وتساهم فالأمن الغذائي، مع تنويع أنشطتها فالطاقة والماء والابتكار، وأكد: “الثروة الكبرى ديال المغرب هي الناس ديالو”.