كود الرباط//
علمت “گود” أن وفد طبي تابع للمستشفى العسكري بالرباط حل يوم ثاني عيد الفطر بإحدى المصحات الخاصة بمدينة وجدة، بتعليمات مباشرة من الملك محمد السادس، لإنقاذ الحالة الصحية المتدهورة لشيخ الطريقة القادرية البودشيشية، جمال الدين البودشيشي.
المصادر ديال “گود” أكدت أن الشيخ كيرقد فهاد المصحة لأزيد من شهر، وكانت حالتو الصحية فمرحلة حرجة، وهو الشي اللي استنفر الديوان الملكي ودفع لتدخل عاجل من الطب العسكري.
الطاقم الطبي اللي مشى من الرباط للوجدة لقاه فحالة جد مزرية، وكان كيصارع من أجل البقاء، وهادشي اللي خلاهم يدخلو فشكل استعجالي ويخضعوه لنظام علاجي صارم تحت مراقبة دقيقة وتتبع يومي.
هاد الخطوة جات فإطار العناية اللي كيعطيها سيدنا للرموز الدينية ديال البلاد، وخصوصا شيخ الزاوية البودشيشية اللي عندو وزن كبير وسط المريدين ديالو وداخل الأوساط الروحية بالمغرب.
الشيخ كيتلقى اليوم العلاج تحت إشراف مباشر من أطباء الطب العسكري، وسط تكتم كبير، وأمل كبير وسط المريدين ديالو أنه يتجاوز هاد الأزمة الصحية ويعود لحياتو الطبيعية.
