سامي العلوي -گود كازا //

رئيس جامعة الحسن الأول بسطات الجديد عبد اللطيف مكرم دايرا ليه كلية العلوم القانونية والسياسية الصدع، بسباب كثرة المشاكل لي خلاها العميد نجيب الحجيوي المعفي على ملف “الجنس مقابل النقط “..

رئيس الجامعة شكر بزاف الناس ديال المدرسة الوطنية للتجارة والتسيير وناس كلية العلوم والتقنيات وطلب منهم يعاونوه على الاصلاح ولكن هاد الكلية على حساب مصدر “گود” فيها شي ناس من العهد القديم لي باغينها تبقى فبلاصتها.

وفي اجتماع ديال الرئيس عبد اللطيف مكرم مع أساتذة وموظفين والعميدة نفسها، ناض استاذ جامعي كينتمي لشعبة القانون العام باللغة الفرنسية وفرگع الرمانة في الاجتماع.

الاستاذ ووفق مصدر “گود” من داخل الاجتماع، قال للرئيس “الى بغيتي تصلح خصك تحيد العناصر ديال العصر القديم لي كتعرقل هاد الشي” واضاف “كاين التزوير وانا بنفسي زورو عليا بزاف ديال المرات وحطيت شكايات والعميدة تسترات عليهم وحتى لي قبلها”.

الهضرة ديال الاستاذ على حد ما قال مصدر”گود” ما وقفتاش غير هنا بل قال ان ناس كيتسجلو بالباك القديم ووحدين آخرين كيتم المنع ديالهم من هاد الحق.

فسياق واحد اخر تأكد الاعفاء الرسمي ديال عبد الله كواعروس نائب العميدة المكلف بالتكوين من منصبو من بعد الشوهة لي شوه المؤسسة والصراعات لي دخل فيها.