كود الرباط//

اليوم الاثنين 10 فبراير الجاري، فجلسة الاسئلة الشفوية بمجلس النواب، عرف مداخلة مهمة كتنبه لخطورة انتشار التحريض فالسوشل ميديا عبر نشر فتوى في مواضيع مدونة الأسرة وغيرها من المواضيع.

حنان اتركين، عن حزب الأصالة والمعاصرة، نبهت لخطورة هاد الفتوى التحريضية من أشخاص مشرفين على مدارس عتيقة ودخلاء، ومنهم من يفتي بعدم جواز المواسم الدينية بسوس ويعتبرها “شركا”.

وتطرقت اتركين كذلك إلى الفتوى الخطيرة حول مدونة الأسرة، معتبرة بلي هادشي فيه تطاول على الشأن الديني وعلى الافتاء لي هو اختصاص حصري للمجلس العلمي.

وزير الأوقاف أحمد التوفيق، أكد بلي كاين فرق بين الافتاء والإرشاد، الأخيرة هو تشرح الناس كيفاش تصلي وتوضي وكيفاش تقسم الورث، والافتاء اختصاص حصري للمجلس العلمي الأعلى.

وأشار التوفيق بلي فهاد الزمن ديال “حرية التعبير، كلشي كيتكلم، كيبقا المستهلك يستهلك بضاعة دينية يشوف شكون يصدرها ووو”، وهنا حسب الوزير كاينا مسؤولية مشتركة.

وجوابا على تعقيب البرلمانية قال الوزير التوفيق “حنا مقابلين التطرف يلا كان شي قيم ديني فيه ريحة التطرف كنتدخلو ويلا كانوا اخرين كاينين جهات مكلفين”.