گود سبور//

ناوي هشام آيت منا وشي أعضاء محسوبين عليه فالمكتب المديري للنادي، يطيرو المدرب أمين بنهاشم من المنصب ديالو باش يغطيو على الفشل ديالهم فمونديال الأندية.

وحسب مصادر مطلعة، ف آيت منا وشي وحدين ديالو فالمكتب المديري للوداد الرياضي، باغيين يمتصو غضب الجماهير الودادية والمنخرطين فالنادي، بإقالة المدرب أمين بنهاشم من منصب المدرب، واللي تعين فيه غير شهر ماي اللي فات فبلاصة المدرب الجنوب إفريقي رولاني موكوينا، اللي صبرو عليه عام على قدو حيث كان الموقف ديالو صحيح بالعقد اللي كان عندو مع النادي وبقآ مجرجرهم حتى لآخر الموسم باش لقاو معه حل على الانفصال بعد ضغط كبير من الجماهير.

هاد الخطوة الجديدة من آيت منا وشي وحدين، هدفهم منها، هو يبعدو الجمهور على المتسبب الرئيس فالمشاركة الكارثية للوداد فمونديال الأندية، واللي كلشي كايعرفو وهو التسيير العشوائي ديال الرئيس الحالي والمحسوبين عليه فالمكتب من انتهازيين، حيث هما اللي حطو الفريق الأحمر فهاد المصيبة والمشاركة الكارثية فالمونديال بالإقصاء من دور المجموعات والخروج بزيرو نقطة وبثلاث خسارات مع مانشستر سيتي ويوفنتوس والعين، مع العلم أن المكتب المديري فيه أعضاء ضد آيت منا والتسيير اللي كايدير فيه وكانو ساكتين له على قبل الجمهور اللي طالب به كرئيس للنادي بعدما باع لهم الوهم، وفضلو هاد الأعضاء أيضا السكات باش ما يكونش انشقاق داخل النادي حيث المرحلة السابقة كانت حساسة ولكن دابا ما بقاوش غايسكتو له وناونيين يتحاسبو معه.

هشام آيت منا وفبلاصة ما يخرج على السكات ديالو ويعتذر من الوداديين على الكارثة اللي تسبب بها فالوداد كيفما كايديرو المسييرين الصحاح، اختار ييضربها  بسكتة ويدير بحال النعامة حتى تدوز العاصفة، زعما حتى ينسي الوداديين، وفبلاصة ما يقدم استقالتو من النادي ويتحاسب على لي تسبب فيه للفريق الأحمر، ناوي يمسح المشاركة الكارثية فالمدرب أمين بنهاشم اللي أصلا شد الوداد غير شهر واحد، وهذا الشي ما كافيش لتحقيق نتائج فالمونديال، وراه بزاف ديال الوداديين بداو كايقتانعو أن آيت منا خاصو يمشي بحالو، حيث كبيرة عليه الوداد وهو كايعرف غير للتصاور المحروگين كيفما مشى دار فميريكان ملي سافر للسياحة فالمونديال مع عائلتو وركب على الإنجاز اللي حققو الرئيس الأسبق سعيد الناصيري حيث هو اللي كان له الفضل فتأهل الوداد لمونديال الأندية.