احمد الطيب كود الرباط///

رئيس الحكومة الاسبق الامين العام لحزب العدالة والتنمية عبد الاله بنكيران خرج قبل يومين فحملة الانتخابات الجزئية لدائرة المحيط بتصريحات قال فيها باللي رئيس الحكومة الحالي عزيز اخنوش نقص للارامل 500 درهم.

بنكيران قال بالحرف باللي خلال ولايتو فالحكومة “لمرا اللي عندها 3 دراري بدات كتقبض 21 الف ريال ولا عندها جوج كتقبط 14 الف ريال وكتقبط 7 الاف ريال ايلى كان عندها ولد واحد. واضاف “جاو هادو =فاشارة لحكومة عزيز اخنوش= قال ليك غاديين يحيدو دعم الارامل وسماوها الدعم الاجتماعي المباشر ولكن لمرا مولات 3 اولاد واللي كتقبط 21 الف ريال ردو ليها 10 الاف ريال”

واش هاد لكلام صحيح؟ حسب ارقام رسمية ومصادر حكومية ل”كود” هادا فايك وكذوب. مصادر “كود” قالت باللي “على عكس ما صرح به عبد الاله بنكيران، رئيس الحكومة السابق، لي قال “جات حكومة اخنوش حيدات دعم الأرامل ودارت دعم مباشر، لي كتقبط 21 الف ريال ردو ليها 10 الف ريال”، تؤكد المعطيات الرسمية بأن النساء الأرامل غادي يستفدو وفق نظام الدعم الاجتماعي المباشر، عن كل طفل حاليا 350 درهم شهريا في حدود 3 أطفال (يعني 1050 درهم للأسرة الواحدة المكونة من 3 أطفال) وهو نفس المبلغ للي كان فبرنامج دعم الأرامل”،

مصادر “كود” اكدات باللي ماشي غير هاد الشي بل هاد الدعم المباشر غيوصل لـ375 درهم عن كل طفل ف2025 ول400 درهم خلال سنة 2026 (بذلك غايكون 1200 درهم للأسرة الواحدة المكونة لثلاثة أطفال).

مصادر “كود” اضافت باللي حتى فشروط الاستفادة من دعم الأرام كانت كثيرة فالبرنامج السابق لي جاب بنكيران، في حين ان دبا ان الشرط الوحيد للاستفادة هو التقييد في السجل الاجتماعي الموحد واستيفاء العتبة المحددة للاستفادة وبفضل النظام الجديد لبرنامج الدعم الاجتماعي المباشر، ارتفع عدد النساء الأرامل المستفيدات من الدعم المباشر إلى أزيد من 400 ألف إمرأة، موزعة بين 83 ألف أرملة حاضنة للأطفال و317 ألف إمرأة ليس لديها أطفال، في حين أن آخر دفعة للبرنامج ديال دعم الأرامل لي جاب بنكيران كانت نونبر 2023، واستفدت منو فقط 77 ألف إمرأة حاضنة لما مجموعه 130 ألف طفل. بنكيران لم يكتفي فقط بترويج الفايك بل زاد هضرة أخرى داخل فالدين ومعندوش الحق يقولها، لأنها كاينين مؤسسات دينية رسمية يقدرو يديرو الافتاء حول الدعم المباشر واش مخالف للدين ولا، بنكيران قال : “أخنوش خالفتي الدين وخالفتي القوانين. وخرجتي على المبادئ “.