كود – أزيلال//

فاليوم العالمي لذوي الهمم ”زهير تمهريرت وعبد الحليم أوشكني“ جوج د الشبان من هاد الفئة ، دارو اعتصام مفتوح قدام مقر الجماعة الترابية بتيفرت نايت حمزة،اقليم أزيلال  واستمر أكثر من شهرين كاملين على حد قولهم  فظروف صعيبة، وبكل سلمية واحترام .

كيأكدو هاد الشابين  لـ كود أن الاعتصام ما كانش على شي طلب صعيب أو تعجيزي، بالعكس كان على حق بسيط وعادل كيضمن ليهم الكرامة والعيش الكريم ،ومن جهة أخرى تيضيفو ان  عامل  إقليم أزيلال تدخل، واستمع ليهم مزيان ، وهاد الشي لي كان عطاهم شوية ديال الأمل، ”عبد الحليم “ تيقول انه  مع الأسف، وخا هاد التدخل، باقي ما كاين حتى تجاوب فعلي مع مطلبهم، من غير السكات .

زهير حتى هو عبر  على سخطو من الوعود اللي بقات  بلا تنفيذ، وقال بصراحة أن صبرهم تسالا، وأنهم مستعدين يديرو معركة نضالية جديدة، سلمية وقانونية، باش يحميو حقهم.

الادماج تيقولو ماشي صدقة، حيت حق ديالهم كمواطنين كاملين المواطنة وخا إعاقتهم ،وفنفس الوقت حمّلو الجهات المعنية كامل المسؤولية، وناشدو الضمائر الحية باش تنصفهم وتشوف وضعيتهم بجدية إنصاف.