سهام البارودي كود//

الإنترنيت وخصوصا السوشل ميديا حلات آفاق جديدة لبزّاف ديال الناس ودوك الطرق الكلاسيكية باش دّير لاباس لي كانت معروفة هادي واحد العشر سنين قدامت ومابقاتش واكلة.

كل شهر كانشوف شي مؤثر جديد ولا مؤثرة جديدة كايبانو، وعكس هادي واحد الخمس سنين لي كانو كايدخلو للسوشل ميديا أفراد، دابا ولاو عائلات بالأب بالأم بالأولاد والأحفاد وعيالاتهم كايدخلو لعالم السوشل ميديا وكايديرو “قانا”… شحال هادي كنتي لابغيتي دير لاباس ماعندكش ستين ألف طريقة، عندك يا القراية يا الحرفة يا تغامر شي مغامرة وتمارس شي حاجة خارج نطاق القانون.

دابا لا؟

دابا دري عندو تمنطاشرعام كايستريمي كل نهار يقدر يدخل أجرة ديال برلماني صافية من الضرائب.

شحال هادي المغربي كان باش يدير الدار كايتكحفر حياتو كاملة باش يجمع ليها ولا كايتعلق فشي كريدي خمسة وعشرين عام باش يتسمى عندو الدار! دابا بنت كادخل لتيكطوك النهار الاول كاتصور ليك دارهم غا كارين بيت مع الجيران وكايطيبو فبوطة صغيرة، كادوز عام كاتحط ليك فيديو “وأخيرا شريت شقة أحلامي”، كاضرب ست شهور اخرى “وأخيرا شريت سيارة الأحلام”.

بلا قراية بلا كونكورات بلا حرفة بلا موهبة خطيرة….

هادشي خلاني نطرح على راسي سؤال، واش مازال فالمستقبل غاتلقى خدامة ولا طباخة تجي تخدم معاك للنهار بميتين درهم؟ والأهم من هادشي كولو هوا واش باقي الشباب فالمستقبل غايبغي يدفع لكونكور التعليم باش يخدم بخمسالاف درهم فالشهر؟ والعسكر والفراملية وگاع الوظائف والمهن لي فيها تعب كبير وأجر هزيل في حين آية بشري بلا باك بلا أدنى مجهود كايسيفطو ليها الداعمين خمسالاف درهم فالنهار؟