كود – كازا //

فأول أيام المعرض الدولي للنشر والكتاب، كشف المجلس الوطني لحقوق الإنسان نهار الجمعة 1 ماي 2026 على مكتبة رقمية خاصة بحقوق الإنسان، فيها تقنيات ديال الذكاء الاصطناعي، لي حاطها رهن إشارة الزوّار ديال “رواق الحقوق” كاع أيام المعرض.

هاد المنصة اللي غادي تولّي ابيلاكصيو وموقع، كتخلي الحقوقيين/ات، الطلبة، الباحثين/ات، الصحافيين/ات، وحتى المهتمين، يدخلوا بالخف لجميع إصدارات المجلس سوا تقارير، دراسات، آراء وتوصيات، ويطّلعو عليها بطريقة سريعة وبسيطة.

الميزة الكبيرة فهاد التطبيق هي أنه فيه سيستام ذكي تفاعلي، اللي كيخلّي المستخدمين يهضرو ديريكت مع المحتوى، يطرحو أسئلة، ويستكشفو مواضيع حقوق الإنسان بطريقة ساهلة ماهلة، وهاد الشي كيقرب المعرفة الحقوقية من الناس.

وبمناسبة إطلاق النسخة التجريبية، واللي تصايبات كاملين بالخبرات الداخلية ديال المجلس (in-house)، قالت رئيسة المجلس آمنة بوعياش بلّي الابتكار الرقمي ماشي هدف بوحدو، ولكن وسيلة باش تقرّب حقوق الإنسان للمواطنين وتعزّز الولوج ليها.

المجلس باغي من  هاد التطبيق يوسّع الدخول للمعرفة الحقوقية ويقرّبها للناس، وهاد المبادرة كتبين الرغبة ديالو فالتجديد ديال طرق التواصل مع قضايا حقوق الإنسان.