كود -وكالات//

غير كيوصل الصيف، كيبداو يبانو كرارس الهندية فكل قنت وفكل درب، هازين الكرموس ، ولكن ديما كتسمع شي حد كيقول لك  : “كل وقيّس ولا غادي تعصم!”. وهاد الهضرة راه ماشي غير خرافة شعبية، ولكن حقيقة علمية وطبية ، والسبب فيها ما كيرجعش لتكناريت بوحدها، وإنما المشكل كامل مخبي فدوك العظام الصغار اللي عامرين لداخل ، هادوك العظام كاملين كيهبطو للمعدة والمصران ،وبما أن الجهاز الهضمي ديالنا ما كيهضمش هاد العضام ، فرها كتدوز كيف ما هي للمصران الغليظ، تما الأمعاء كدير الدور الطبيعي ديالها اللي هو امتصاص السوائل والماء.

المشكل هو ملي كتكون واكل كمية كبيرة، كتجمع واحد الكتلة كبيرة ديال العظام ، ومع امتصاص الماء كينشفو وهاد العظام كيلصقو مع بعضياتهم بحال السيمة، وكيشكلو كتلة قاصحة بزاف بحال الحجرة، هاد الكتلة كتسد المخرج وكتخلي الأمعاء مقدراش دفعها لبرا، وهادشي هو اللي كيخلي بنادم ويتحصر ويتعصم ويعيط وامعتصماه خصوصا إلا كان عندو الجهاز الهضمي والمصران على قد الحال.

باش الواحد يتفادى هاد المحنة ويستمتع بالزعبول بلا خوف، القاعدة الذهبية هي يقيس ،يعني ما تفوتش تلاتة حتى لخمسة د الحبات فالنهار كحد أقصى ،وحاجة أخرى مهمة، هي ملي تاكل الهندية، ضروري تشرب معاها كاس ديال الماء، حيت كيعاون العظام باش يبقاو مفرقين وما يتجمعوش فالمصران. أما الناس اللي كيموتو عليها وما كيقدروا يقاوموهاش، فأحسن حل ليهم هو يطحنوها ويصفيوها مزيان من دوك العظام، ويشربوها كعصير بارد ، هاكا كيستافدو من الفيتامينات ديالها.