كود -وكالات//

كشفات دراسة جديدة تنشرات فمجلة The Lancet Psychiatry باللي الاكتئاب المرتبط بالحمل والولادة ولى مشكل عالمي خاصو اهتمام كبير، حسب هاد الدراسة، وحدة من كل 15 مرا كتعاني من الاكتئاب فالسنة اللولة من بعد ما تولّد، وحتى ففترة الحمل كاينة وحدة من كل 16 مرا كيجيها الاكتئاب، الشي لي كيبين باللي هاد المرحلة حساسة بزاف نفسياً.

وبيّنات الدراسة باللي الاكتئاب كيوصل لأعلى مستوى ديالو فالسيمانات اللولين من بعد الولادة، فين كيوصل لـ 8.3%، ومن بعد كيبقى حاضر نسبيا طول العام اللول. وماشي غير “كآبة خفيفة”، ولكن كاين حتى اكتئاب قوي كيكون فيه حزن كبير، فقدان الرغبة فالحياة، وصعوبة فالتأقلم مع الروتين اليومي.

حسب الدراسات بزاف ديال الأسباب كتخلي هاد الحالة توقع منها الهرمونات، حيث مني كتولد المرأة كيوقع نقص كبير فهرمونات الإستروجين والبروجستيرون، وهاد الشي كيأثر مباشرة على المزاج ديالها والحالة النفسية.

وزيد عليها العيا اللي كيكون من بعد الولادة، وقلة النعاس وضغط المسؤولية الجديدة، وحتى التغيير المفاجئ فالدور والهوية ديال المرأة، هاد الشي كامل كيقدر يزيد من خطر الاكتئاب، وحتى العزلة وقلة الدعم من الناس اللي دايرين بها كتلعب دور كبير، حيث إلا ما لقاتش اللي يوقف معاها ويساندها، الحالة كتقدر تزيد تعقد.