كود – عثمان الشرقي //

فالذكرى الأولى لسقوط نظام بشار الأسد، خرجات مقاطع فيديو ولات تراند، كيبان فيها الأسد وهو كيهضر مع مستشارتو الإعلامية، لونا الشبل فدورة بطموبيل وهو سايك جوايه دمشق.

التسجيلات اللي دوزاتها «العربية» كيبان فيها الأسد ولونا الشبل كيضحكو على الجنود السوريين اللي كانو كيبوسو يد الرئيس المخلوع، فمقطع آخر سولاتو لونا الشبل شنو كيحس ملي كيشوف صورتو فالشارع، قال لها بلي ما كيحس بحتى حاجة، قبل مايبدا يسب منطقة الغوطة وماليها، وزاد قال خاص العائلة تبدل اسم الأسد لشي حيوان آخر.

فـ 5 يوليو 2024، الرئاسة السورية علنات وفاة لونا الشبل، المستشارة الإعلامية ديال الأسد، بعدما تعرضت لحادثة خايبة. معلومات أخرى قالت إن الحادث كان مدبر، وجا بعد سيمانة من توقيف خوها ملهم وراجلها عمار ساعاتي، عضو القيادة المركزية لحزب «البعث»، مني كانو بغاو يسافرو لروسيا.

لونا الشبل كانت خدامة فـ قناة الجزيرة قبل ما تلتحق بنظام بشار فالعشر سنين الأخيرة ديالو، قاسم سليماني كان شاك فيها بلي عميلة وجات باش تجسس على الرئيس وماكانش كيتيق فيها، الهضرة اللي كانت دايرة فسوريا أنها عشيقة ديال بشار، لونا سبقات صرحت علانية بأنها كتمنى تموت مراة بشار المريضة بالسرطان باش تولي هي السيدة الأولى ديال سوريا.

هاد التسريبات كتبرز الجانب المظلم والمخفي من حياة بشار الأسد ومستشارتو المقربة، وكتعطي فكرة على النفوذ الكبير اللي كان عند لونا الشبل فالنظام السوري، وكيبان من خلالها أن الصراعات الداخلية، والمصالح الشخصية، والخوف من السلطة، كانوا جزء من الحياة اليومية وسط قصر الرئاسة، قبل ما يطيح النظام نهائياً فـ 8 ديسمبر 2024.