سهام البارودي – كود//

مؤخرا نايض الصداع على واحد الطفلة بانت فبرنامج رشيد شو و قالت بلي عمها كايشدها و كايعضها و كايضربها و كايتعدى عليها.
لاترجمتي هاد الجملة للفرونسي و لا لونگلي و لا الالمانية و قالها شي طفل فشي برنامج فشي دولة اوروبية، لي انا متأكدة منو هوا انه غاتنوض القربالة و غايمشي الحزاق كامل بحيتة ( البو ، الام، العم، العائلة …) ! و غايتفتح تحقيق فشنو كايطرا لديك البنت فدارهم و كيفاش هاد عمها كايعضها و كايضربها و كايتعدى عليها، و كاين احتمال كبير ديك البنت يحيدها السوسيال لديك العائلة بيدما يكمل البحث، و القضية غايدخلو فيها البوليس، و جمعيات حماية الطفولة و الصحافة و فكها يا من وحلتيها. هادشي طبعا فالدول لي كاتحتارم الطفل و كاتعطي أهمية و مصداقية لهضرتو و كادافع عليه و كاتحميه حتى من اقرب النّاس ليه.

حيت فالدول المحترمة، الكلب ماعندكش الحق تقيسو و تكاريسيه و تلعب معاه لاماطلبتيش الاذن من مولاه، أما الدراري الصغار، غير جمع يديك و فمك و حناكك عندك حيت بوسة تقدر تسيفطك بشي تهمة تحرش و يوليو مركبين ليك براصلي فرجليك فحال شي سيفيانوس !
هادشي فالدول المحترمة، اما عندنا فالمغرب مازال شي وحدين كايدافعو بوجههم احمر على حق العم فأنه يبوس بنت خوه و يعضها و يتعدى عليها، وا لاواه، مافيها والو، غي عمها هاداك، المعزّة هاديك… و شي جمل كايشهيوك تشد مولاهم و تعضو هوا نيت من سوّتُو.
حسب واحد الأرقام خرجاتهم جمعية ماتقيس ولدي فألفين و عشرة، الاغلبية الساحقة ديال حالات الاعتداء الجنسي على الاطفال كاتكون من طرف الأقارب ديال الطفل يعني بّاه، خوه، عمّو، خالو، ولد خالو، و من مورا الأقارب كايجيو الاساتذة، و حتى فالواقع فاش كايعاودو الناس قصص الاعتداء فراه فالدرجة الاولى كايكون المجرم من العائلة القريبة لداك الطفل و كايستغل القرابة و الغفلة و الكالاخ و الاهمال ديال الواليدين باش يتعدى على داك الطفل.

وواخا هاكاك، واخا الارقام و الدراسات و التجارب لي بزاف ديال الضحايا كايشاركو فالسوشل ميديا، واخا هادشي كولاّهوا مازال بنادم راسو مربّع كايدافع بوجهو احمر على الحق في الاعتداء على الاطفال كايقوليك لا شنو فيها لابستو ؟ راه ولد خويا هاداك ؟ كيفاش شنو فيها، وا بعرور واش كايصحابكم الاطفال مونيكات كاتلعبو بيهم، آ سيدي جمع دلقوشك و جمع يديك !

الطفل ماشي لعبة باش لي جا يبقى يمطمطو و يقيسو و يتلمس فيه، حافظو على الحرمة ديال وليداتكم يا عباد الله و نتوما كاتخليوهم مستباحين للمجرمين و المرضى ! لاش هاد قوة البوسان و التمطميط ؟ لي عزيز عليه شي دري صغير يشري ليه بلاي ستايشن و لا طابليط و لا مونيكة و لا حك ديال دانون ! الله يخلف عليك أما دلقوشك غا خليه باش تبوس بيه يد مّك.