كود سعاد زرار ///

نايض نقاش على ضيف المعرض الدولي للكتاب اللي جا البارح لثلاث 14 ماي 2024 بالرباط. الضيف كان هو “النامبر وان” ديال المصريين الممثل والمغني والنجم الكبير محمد رمضان. هاد النجم استقبلو وزير الثقافة والاتصال محمد بنسعيد. كان حضور اعلامي كبير لهاد الاستقبال. كلشي توجد ليه باش يتم تسويق هاد الزيارة.

النقاش واللي هو صحي بزاف هو اش جاب محمد رمضان لمعرض للكتاب. اصلا باش هرب هاد لوزير ظلما وشي نهار يتصحح هاد الظلم٬ معرض كازا للكتاب لمدينة الرباط راه مشكلة. من بعد يجيب شي حد ما عندو علاقة بالكتاب٬ كتعطي صورة على كيفاش كيشوف هاد لوزير الثقافة والاعلام.

كاين غياب لسياسة ثقافية. الوزير ما عندوش شي سياسة. طبعا هاد الشي جاي من ضعف ثقافتو السياسية٬ لحد الان كيدير عمل مزيان ولكن ماشي فالثقافة ككتب ومسرح وسينما =عندو وزارة الاتصال حتى هي= وتشكيل ورقص… كيدير اكثر الترفيه. كيركز على امور مهمة حتى هي للبلاد بحال الزليج وتسجيلو فالتراث العالمي للانسانية. فالمقابل كيتخلي على اختصاصات وزارة الثقافة كيف دار فتدبير متاحف عطاهم لمؤسسة متاحف المغرب اللي كيشرف عليها مهدي قطبي من 2012. الوزير الاسبق لعرج محمد كان رفض يتخلى على المتاحف وكان عندو تصور ان وزارة الثقافة تقدر تولي من الوزارات ذات المداخيل لكبيرة من اللي تابع ليها كالمتاحف ايلى تم ادارة هاد لشي بعقلية مهنية. بدات المداخيل كترتافع فالوزارة لكن بنسعيد اللي ما عندوش خلفية ثقافية كبيرة تخلي على ثروة كبيرة لمؤسسة المهدي قطبي. 

المهم ان بنسعيد كيدير دابا الثقافة بمنطق الترفيه. عليها خاص رئيس الحكومة عزيز اخنوش اللي كيوجد للتعديل الحكومي يغير الهندسة الحكومية يزيد الترفيه فيها وتبقى عند بنسعيد. لاحظو مستشاريه ومساعديه وكلشي اللي دارو من نهار وصل كيدخل فالترفيه. هاد الجانب راه مهم بزاف للبلاد للمغرب ومحتاجينو بزاف غير خاصو ميزانية اكبر وتدبير اكثر عقلانية. هادي وزارة كاينة فالسعودية عند تركي الشيخ وخدامة مزيان٬ ممكن ينجحها بنسعيد. 

باش تجيب محمد رمضان تسوق بيه راسك وتصورو مع جوج كتوبا على الصحرا باش يقولو راه مع مغربية الصحرا راه فيه استحمار للعقل المغربي ولكن جبتي رمضان خليه يدير جولات فنية وتكون مدن الصحرا ضمن هاد الجولة

بنسعيد وزير للترفيه بدون حقيبة بدون ميزانية مناسبة. خاص تعطيوه هاد الباليزة الحكومية