نجوى المالحي-كود//

الخدمة لي دار الممثل يوسف أوزلال بشخصية فاطمة تاويل والنجاح اللي وصل ليه خلاه يتعامل، اليوم، في الفيديوهات ديالو مع مؤسسات وشركات ديال الاشهار ويولي كيتخلص على اعمالو.

أوزلال تعامل مع مؤسسة محمد السادس لحماية البيئة ودار فيديو باش يدوي على حملة “بحر بلا بلاستيك” ودوا على الوسخ والعفن لي كيولي في البحورة مع صيف.

الرسالة ديالو وصلها بطريقتو، لكن فاش دوا على صحابات البوركيني، لي حتى هما غزاو البحورة ديال المغرب، ناضو ليه في التعاليق، وقالو ليه حرية شخصية هاديك! وهي فالحقيقة عندو الحق، البحر بلاصة البيكيني والمايو، ماشي البيجامات والبوركيني.

الكوميدي قال في الفيديو علاش العيالات يعومو بالبيجامات والفولار، لي بغات تعوم بهادشي من الأحسن تبقى في الدار. لكن بزاف معجبهمش الطريقة باش تكلم واعتبرو أنه لا يؤمن بالحريات الشخصية.