محمد سقراط-كود///

للأسف المغرب لي حمى اليهود المغاربة من المحرقة ومارضاش محمد الخامس يسلمهم للنازيين بحال لي داروا اغلب الدول في أوروبا، هاهي تتحول شوارعه لساحة لمعاداة السامية، وكون غير ضد الأجانب راه عيبنا واحد خلاها المراكشي، وانما ضد مستشار سيدنا لي حياتو كلها وحياة جدودو وواليديه أفنوها في خدمة المغرب، أندري أزولاي ماشي قطر بيه السقف في المغرب بل هو يهودي امازيغي قح، والامازيغ عتانقوا اليهودية في المغرب هادي تلتالاف عام وماشي جاو من شي بلاصة راهم امازيغ احرار ولاد البلاد، ولكن للأسف من قطر بهم السقف ديال بصح ولاو يتجرأو على المغاربة الاحرار في غياب قانون حقيقي كيحمي المغاربة بجميع مكوناتهم من العنصرية ومعاداة السامية.

واحد من أزهى عصور الدولة العلوية الشريفة هو العهد ديال سيدي محمد بن عبد الله، حيث ساد الرخاء والسلم والسلام والاستقرار، وبالنسبة ليا سيدنا والعهد ديالو كيشبه بزاف لجدو سيدي محمد بن عبد الله، ومن انجازات هاد السلطان العظيم هو مدينة الصويرة وتحويلها لميناء تجاري، ومن الناس لي ساعدوا الدولة آنذاك في ازدهار هاد المدينة والمنطقة ككل هم أجداد اندري ازولاي، حيث لعب التجار اليهود وعلاقاتهم الخارجية دور كبير في ازدهار هاد المدينة واستقراررالحكم أيام سيدي محمد بن عبد الله، تفاصيل هادشي غادي تلقاوهت في واحد الكتاب رائع عن تجار الصويرة للباحث الأمريكي دانييل شروتر، باش تعرفو بلي اليهود المغاربة ربح للبلاد خاص نحافضو عليه ماشي العكس.

المغرب اليوم محتاج لنصوص تشريعية كتحارب معاداة السامية ونشر الكراهية والتحريض على الأقليات الدينية والعرقية ، راه لا يعقل تبقى سايبة بحال هاكا، أملنا كبير في وهبي انه يحصن المغاربة بترسانة قوانين كتحميهم يهود ومسلمين ومسيحيين واتباع سيدنا خضر وملحدين وكاع المغاربة بجميع اطيافهم راه هتد البلاد كتجمهم وخاص قوانين تحميهم من الاسائة ليهم، الصراحة فاش كنسمع السبان في حق اندري ازولاي والله حتى كنحس بحال الى كيسبو ليا شي رمز من رموز الأمة او شي واحد من العائلة لأننا كمغاربة قاطبة مدينين لأندري ازولاي ولأجداده ولليهود المغاربة قاطبة بالكثير من مظاهر العصرنة والتحضر وكذلك الدعم اللامشروط لوطنهم الأم في المقابل الدولة خاص تدير قوانين وتطبقها كتحميهم من معاداة السامية وعلاش لا ناخدوهم من القانون الفرنسي ديريكت.