سهام البارودي – كود//
الاغلبية د المشاركين فالحملات الانتخابية غير البوڤريا المقودة عليهم بزاف، ماكايبانش ليك شي حد من الطبقة المرقعة شوية و لا المتوسطة هاز طعريجة و كايغني “ديرو العالاما عالا الحاماما”، أما الطبقة الخانزة فلوس هادوك مايمكنش يهبطو لاهوما لاعيالاتهم يلقيو وجهم للشموش و الغبابر باش يطبلو فشي حملة لشي حد !
لدرجة الحملات الانتخابية ولات اكبر دليل على فشل النسق السياسي فالمغرب، نتا داير الحملة ببنادم وجهو كايبان فيه الزلط و القهرة و السنان ماعندوش، كي درتي ليها ؟ واش ماشي قمة الفشل آ سّي السياسي ؟ العيالات لي كايطبلو ليك و يغنيو بسميتك عندهم غا سنة وحدة كي ساروت الحبس ! الرجال رقيوقين و شاحبين و فمهم بيض بقوة سوء التغذية ! الزلط هاز طعريجة و كايطبل !
انا لي كانشوف انه السياسيين فالمغرب و الاحزاب اغلبهم فاشلين و مايديروش التأطير المطلوب منهم للمواطنين، مانايضش مانايضش اللهم ينظمو شي حملات باش يصلحو سنان عباد الله لي كايحرثو عليهم فالحملات الانتخابية، يشوفو واش يركبو ليهم فّام و لا يتفوبرو عليهم بشي هوليود سمايل عند صوفيا كلينيك !
باش لاباسك المواطن و تعانگ معاك ماتشمش فيه ريحة الموت و لا غنا الشعار د الحملة يخرج ليك مسگم بلا دفال !
