سهام البارودي – كود//

اللحايا ديما خارج التاريخ، عالام خور آ خوتي! كاينطابق عليهم داك المثل ديال الناس فالناس و القرعة فمشيط الراس!
تخايل معايا أنه العالم كايعيش بوادر حرب عالمية ثالتة و الشياط نايض فالشرق الاوسط و الطيارات حابسين فبزاف د البلدان و الإي آي خالق ثورة كبيرة فتاريخ الانسانية و بزاف ديال الناس مهددين يفقدو الوظائف ديالهم …. وسط الصراعات و الحروب و النووي، اللحايا المغاربة البوبرية مضاربين بيناتهم هاد الأيام علاش ؟
قوليا نتا علاش !
على ود آ سيدي قاليك علاش أنس بن محمد واحد اللحية محسوب عليهم كايلبس التوني ديال عبيدات الرمى ولاد علُّو و عاطي لداكشي ديال المناظرات صلية، علاش يمشي لشي برنامج المقدمة ديالو طالقة شعرها ! و نايضة سباط بين المؤيدين و المعارضين و إيلتراس انس بن محمد كونطر ايلتراس قاسم اكحيلات و اليترات مول الفوقية شفرو التيفو لإيلتراس مول باج خواطر ! و الشياط نايض !
واش عمركم شفتو شي مسالية الرّك اكثر من هادي ؟ لا بصّح واش كاتخايلو أنه رجال بموسطاشاتهم يقدرو يكونو كايناقشو شي علم و لا شي اختراع و لا كايديرو غا شي حرفة فحال تانجارت و لا تاگباصت جالسين كايضيعو الطاقة و الجهد فموضوع حامض فحال هذا ! واش هذا أصلا موضوع كايهضرو فيه الناس ف2026 ؟ وااااا يا أمة ضحكت من جهلها الأمم !
بالحق هادشي ماخافيش على الخفافيش، هادو هوما فعايلهم، الناس كاتبني الدول و القوة الاقتصادية ديالها و الاسلحة ووسائل الدفاع و دياولنا منوضين الحرب على ود زغيبات من شعر واحد المقدمة د برنامج ! آ العافية نايضة ! فحال فاش كانت اوروبا مشغولة بالثورة الصناعية و الآلات و الجامعات و الاختراعات كانو شي سوا ديزون علماء فالمغرب كايحرمو أتاي ! و فبلدان اخرى راه حرمو القهوة و الآلة الطابعة و حتى البوق ديال الجّامع قالّيك فالاول لا حقا حرام الآدان خاصو يديرو بنادم ! و هادشي اصلا لي خلا المسلمين لور لور !  و ها الحفايد ديالهم مكمّلين تاهوما فنفس الطريق و نفس النقاشات العوجة الخارجة عن التاريخ ! زيدو زيدو فهاد الكالاخ المبين ! زيدو آ الله يعطيكم الصحّة ! مانايضش مانايضش !