الرئيسية > featured > فاش كاتشوف شي مالين الحوانت كايحطّو الياغورت فوق الكونطوار خارج الثلاجة و كايطفيو الثلاجة فالبرد وكايحطو البوديزات ديال الما قبالة الشمس والخبز لي جّا كايعبّزو بيدّيه ملكّين! الگزار لي كايبيع اللحم مجلخ بالدّم والحوت كايتباع فصنادق محطوطين وسط الغيس والذبان راه على هاد الحساب التسمم العذائي هوا القاعدة والاستثناء هوا أنه مايطرا ليك والو!
25/02/2024 21:00 featured

فاش كاتشوف شي مالين الحوانت كايحطّو الياغورت فوق الكونطوار خارج الثلاجة و كايطفيو الثلاجة فالبرد وكايحطو البوديزات ديال الما قبالة الشمس والخبز لي جّا كايعبّزو بيدّيه ملكّين! الگزار لي كايبيع اللحم مجلخ بالدّم والحوت كايتباع فصنادق محطوطين وسط الغيس والذبان راه على هاد الحساب التسمم العذائي هوا القاعدة والاستثناء هوا أنه مايطرا ليك والو!

فاش كاتشوف شي مالين الحوانت كايحطّو الياغورت فوق الكونطوار خارج الثلاجة و كايطفيو الثلاجة فالبرد وكايحطو البوديزات ديال الما قبالة الشمس والخبز لي جّا كايعبّزو بيدّيه ملكّين! الگزار لي كايبيع اللحم مجلخ بالدّم والحوت كايتباع فصنادق محطوطين وسط الغيس والذبان راه على هاد الحساب التسمم العذائي هوا القاعدة والاستثناء هوا أنه مايطرا ليك والو!

سهام البارودي – كود//

شي سياح نگالزة كلاو فشي مطعم نواحي مرّاكش و جاهم تسمم غذائي حاد ! الخبر نشراتو جريدة الدايلي مايل البريطانية.

أنا بعدا ماكاتجينيش غريبة انه الانسان يجيه تسمم فبلاد فيها مول الحانوت كايطفي الثلاجة فالبرد و كايحط دانون فوق الكونطوار و لي جا يشري الخبز كايعبّز شي ثلاتة و لا ربعة بديه ملّگين عاد كايختار هاديك لي غايشري ! فالمغرب شروط السلامة الغذائية كايستاهنو بيها الناس بشكل كبير ! من اصغر مول الحانوت حتى لدوك الريسطورات الكبار لي كايضربوك حتى كاتسنّد !
فدول كبيرة و محترمة و عندها صرامة كبيرة فالتعامل مع السلامة الغذائية و هاكاك فاش كاتفرج فشي روبورطاجات كايبانو ليك بلي كاينين انفلاتات ! عسّاك فبلاد تاواحد مامسوّق فيها !
بزاف ديال السناكات و المحلبات و صحاب الشوارما و دوگ الگاراجات مافيهمش طواليط ! الدراري كايخدمو و فاش كاتجيه البولة كايخرج يبول حدا شي شجرة و يمسحو فالحيط و يجي يصايب ليك نص فيه ايزابيل ديال ماطيشة و فرماجة ! بلا مانهضرو على ظروف التبريد لي خاص تنقل فيها اغلب السلع و المنتوجات الغذائية، واش البلاد لي بنادم كايهز فيها اللحم فكاميو مافيهش الثلاجة مايجيكش فيها التسمم ؟! الدجاج كايتباع وسط الذبان و الوسخ و الحوت فالصنادق فالارض منهم للغيس ! الكاشير كايتباع فوق الطبالي ! مايجيكش فيها تسمم ؟
تفكرت أول مرة غانشوف مارشي ديال الحوت فأمستردام ! كان نقي، و الحواتة نقيين ، و الارض ناشفة و نقية، و الحوت مستف و تحت درجة حرارة منخفضة ! كانت أول مرة غانشوف مارشي ديال الحوت مافيهش ريحة الخنز انا لي كان كايصحابني بلي الخنز راه مرادف للحوت و بلي هاديك ريحة الخنز هي ريحة الحوت ! عاد وعيت و عرفت بلي الحوت فاش كايكون طري و كايتباع فظروف سليمة راه ماكايكونش خانز ! و حتى الحواتة كانت اول مرة غانشوف حوات نقي و لابس طابلية و بوط نقي و ماشط شعرو ! ماشي فحال الحواتة لي كنت كانشوف فمارشي سونطرال اللحية مامحسناش و السنان مهدومين و الحوايج مدربلين !

و هادشي ماكاينش غير فالمارشيات د الاحياء الشعبية و السناكات ، لا غاتلقاه حتى فالمحلات التجارية الكبرى و فدوك الريسطورات الغاليين لي ماليهم كايتسقرموا و كايقلبو يقتاصدو فالضو و الما و اليد العاملة حتى كايصدقو مسيفطين شي عائلة للسبيطار و لا قاتلين عباد الله !

المغرب نجح انه يصنع ماركة مسجلة بسميّتو و يخلق واحد الشهرة واسعة و عريضة كاتخلي السياح من بلادات كثيرة تجي ليه، و لكن فحال هاد الحوادث راه كاضرب ديك الصورة فالزيرو حيت الشهرة مزيانة و لكن لاكانت معاها المصداقية سينو راه تا افريقيا الجنوبية مشهورة ولكن قليل لي كايزعم يمشي ليها حيت عندها سمعة د الاجرام سابقاها ! المصداقية و الصرامة و المعقول … هادشي لي محتاجو المغرب دابا لابغا يكمل فهاد المسيرة لي بدا فيها !

موضوعات أخرى

22/04/2024 07:00

قاضي التحقيق بابتدائية سطات هبط موظف سجن عين علي مومن الحبس وها التهم للي توجهات ليه