سهام البارودي – كود//

عرفتي فاش كاطلق شي حزقة خانزة فالقسم ! و كاتسول الاستاذة ” شكون لي حزق؟” ديما هاداك لي دايرها كايكون من أول الناس لي كايدورو وجهم زعما راه تاهوا كايقلب على هاداك لي حزق !

هادشي لي وقع لشي خوانجية و السلفيين غير سمعو خبر الحادث الارهابي لي طرا فمراكش خرجو تاهوما كايتزاحمو مع عباد الله باش يبينو لينا انهم كايستنكرو شنو وقع ! ايه خارجين تاهوما كايقولو ليك ” هادشي لا يمثلنا” و جبدو داك السطوك ديال الآيات ديال الرحمة و الموعضة الحسنة كدا باش يحيدو عليهم التهمة زعما ماشي حنايا و الله ماحنايا !

آ نوضو يا ولاد القحاب كلشي منكم ! نتوما لي كاتروجو للظلامية و الأصولية و الغلو في الدين بين الناس ! و كاترعاو التطرف ! و كاظلو طبلو ليه فمنابركم الاعلامية و صحفكم و فايسبوكاتكم و باجاتكم و بلسان شيوخكم و داعياتكم  الدعوة بيهم لله !

علاه شكون لي فوقما كانبغيو نزيدو خطوة لقدام كاينوض ينبح كي الكلب ماشي نتوما ؟
علاه فاش كانبغيو نهضرو على الحريات الفردية كاتنوضو هازين الزلاط ديال الجهل و التخلف !؟ واك واك بغاو ينشرو الفساد ! واك واك بغاو الفسوق ! و كاتهيجو عواطف الجيوش و الرعاع ضد اي واحد كايبغي يهضر بعقلانية ؟
علاش شكون كايكفر المفكرين  ماشي الشيوخ ديالكم ؟ شكون كايكفر عصيد و كايقول عليك كافر مرتد ماشي واحد لحية التيس منكم ؟شكون هاجم لطيفة احرار و سميرة سيطايل و سناء العاجي و كل من هو فنان او مفكر ماشي نتوما ؟
شكون كان كايقول على فاطمة المرنيسي حمارة ! ماشي واحد البغل منكم ؟
شكون كاياكل الخبز بتجارة الدين و كايربح الاصوات الانتخابية باسم الدين ماشي نتوما ؟
شكون كايظل ينبح بلي قناة دوزام قناة صهيونية ! ماسونية ! من غيركم ؟
شكون من غيركم كايحارب الجمال و الفن و فوقما كايبان شي فيلم و لا مسرحية كاتنوضو تكرعو لينا الفر بواااك واااك بغينا الفن النظيف ! على اساس خاصنا نصبو ليكم الفن بالتيد و جافيل ؟
شكون كايظل يسينيالي الصفحات ديال الفنانات  و الصحفيين من غيركم ؟
شكون عندو كتائب الكترونية مختصة فالسينيال و الهجومات الالكترونية على كل واحد كايختالف معاكم فالرأي او العقيدة ؟
شكون لي حارن كي الحمار فمعركة اللغة و ماباغيناش نزيدو القدام و نحيدو القداسة على اللغة العربية و نتعاملو معاها كأداة للتعلم و نشوفوها واش مسلكانا و لا لا ؟
شكون كايحرن كي الحمار فاش كايتجبدو نقاشات مجتمعية مهمة كاتخص حقوق المرأة و الاقليات الدينية و العرقية ؟ و كايمووووت يدافع على القوانين القروسطية !
شكون باغي يفرق بين الدراري و البنات فالمدارس؟
شكون كايدافع على زواج القاصرات ؟
شكون كاينوض يجدب و يندب فاش كانهضرو على المساواة فالارث ؟

شكون ولد القحبة لي ضد الحرية ؟ ضد العلم ؟ ضد الجسد ؟ ضد الحياة ؟ ضد كل ما هي حاجة زوينة

ياك نتوما يا سباب البلا !

و مازال كاتبوهلو و كاديرو راسكم مافراسكم والو ! و شي وحدين فيكم گاع ناضو كايبكيو قاليك ” الحداثين بغاو يطيحو عليهم الباطل” ! هاي هاي هاي على التقحبين ! آ كاطيرو فالتبوحيط !

المغاربة كانو عايشين نسبيا بيخير و على خير قبل مايبان هاد المد الاسلامي ! قبل ماتبانو نتوما لي كاتسميو راسكم وليدات ” الصحوة” ! ايه كان العنف و الفقر و العنصرية ! و لكن ماكانش هاد الخيخ لي بان معاكم ! آسيدي كنت هانية مع راساتي كمغربية فالتسعينات خوالاتي كايلبسو الميني ! جاراتي كايعومو فالبحر بالمايو ! معلماتي كايجيو المدرسة لابسين ! مشيكين ! مريحين ! الدراري د الدرب كايتسنطو للشاب خالد عوض عمرو خالد ! بيخير و على خير تابديتو كتبانو كي الدود ! تا وليتو بشوية كاتفرضو قوانينكم و إيديولوجيتكم فالمدارس و الجامعات و الكليات و الزنقة و الحمام و البحر …و حتى فقت واحد الصباح لقيت واحد البوال منكم كاتب فالفايسبوك ” نفق ملحد” فاش مات العالم ستيفن هاوكينغ.

هادشي علاش ماكاين لاش ديرو اليوم داك القالب ديال هاداك لي خاري فسروالو و داير مع الناس كايقلب على مصدر الريحة الخانزة !

راه ريحتكم الخانزة هادي لي عطات !و هاد الارهاب و الدم لي كانشوفوه اليوم هوا مسؤوليتكم قدام التاريخ و قدام الوطن !