كود ـ الصويرة//.

عاشت المدينة العتيقة ديال الصويرة، عصر السبت 3 يناير 2026، على وقع فاجعة مؤلمة بعدما طاحت دار سكنية بحي “الملاح” التاريخي.

وحسب معطيات من عين المكان، فالانهيار المفاجئ ديال البناية تسبب فوفاة سيدة ورضيعتها اللي عمرها أربعة شهور، فمشهد كيعاود يطرح بقوة مشكل الدور الآيلة للسقوط فالمدينة العتيقة.

وتصاب شخص آخر بجروح متفاوتة الخطورة، تم نقلو لمستعجلات المستشفى الإقليمي باش يتلقى العلاجات الضرورية.

وفور وقوع الحادث، حلات السلطات المحلية والأمنية بعين المكان، ودارو طوق أمني وسدو مداخل الحي كإجراء احترازي، خوفا من شي انهيارات أخرى ممكنة تهدد سلامة السكان. من جهتها، دارت البومبية تدخل عاجل، وباشرات عمليات البحث والمعاينة تحت الأنقاض، مع نقل جثتي الضحيتين لمستودع الأموات..