كود ـ تطوان//

طلعات حصيلة الناس للي ماتو ف الكسيدة ديال “الرموك” اللي وقعات البارح السبت ف الفنيدق، لـ6 ديال الضحايا وكثر من عشرة ديال المصابين لي باقين في الإنعاش.

الفاجعة اللي طرات ف السونتر ديال الفنيدق واللي اصطادم فيها “رموك” كبير عامر بمواد البناء بجوج ديال البنايات، وحدة فيها قهوة وشقق سكنية، والثانية فيها محلات تجارية وأوطيل غير مصنّف، بحيت من قوة الصدمة شعلات العافية.

العناصر ديال البومبية قدرو ينتاشلو 2 جثث جديدة من تحت الأنقاض، وبهذا طلعات حصيلة الضحايا لـ6 ديال الوفيات، فحين مازال عدد من المصابين لي وصل عددهم لـ10 كيتعالجو تحت المراقبة الطبية فمستشفى سانية الرمل بتطوان.

وحسب مصادر محلية، واحد من الضحايا كان قاعد فالمقهى لحظة الاصطدام ودهساتو الشاحنة، بينما ضحية أخرى فارقت الحياة فالسبيطار بسبب مضاعفات خطيرة، بالإضافة إلى الشيفور ديال الرموك والݣريسون.

عملية جر الرموك شاركات فيها رافعة كبيرة ديال الجيش باش يحيدوه من بين البنايتين. وفي نفس الوقت، واصلات عناصر البومبية عملية البحث على ضحايا آخرين يُحتمل أنهم مازالين تحت الركام.