كود: السوالم//

توصلات “كود” بمعطيات من مصادر قريبة من التحقيقات اللي جرات في الفاجعة ديال الموت ديال أسرة كاملة فيها الأب والأم وابن صغير، إلى أن السباب هو الغاز ديال البوطة اللي تسرب منين كانت هاد الأسرة غارقة في النعاس، لأن شي قرعة ديال البوطة ما كانتش مسدودة مزيان.
تسرب الغاز ديال البوطة اللي لقى جميع المنافذ مسدودة استنشقاتو الأسرة اللي تحولات إلى جثث وما تمش اكتشاف هاد الفاجعة ايلا بعد مرور أيام ووصول الجثث إلى درجة من التحلل وانتشار واحد الريحة كريهة قرب المنزل اللي كاين في الطابق السفلي.
الفاجعة اللي عرفها حي المنزه فالسوالم، لقات فيها السلطات أسرة كاملة جثث بلا روح.

النيابة العامة فالدائرة القضائية بسطات كانت أمرات البارح الاثنين باش يديرو تشريح للجثث ديال أفراد الأسرة، باش يتحددو الأسباب الحقيقية وراء الوفاة.

سكان الحي كانو لاحظو أن الأسرة ما بانتش لعدة أيام، قبل ما تخرج من الدار روائح كريهة، الشي اللي خلاهم يتاصلو بالسلطة المحلية وبعناصر الدرك الملكي.

وبحور عناصر من المركز القضائي والتشخيص القضائي المتخصص فمسرح الجريمة، وزيد عليهم الوقاية المدنية والسلطات المحلية والقوات المساعدة، تم نقل الجثث بتعليمات ديال النيابة العامة.