هشام أعناجي ـ  تصوير: حسني دكالي//

قال كريم زيدان، الوزير المنتدب لدى رئيس الحكومة مكلفا بالاستثمار والتقائية وتقييم السياسات العمومية، في أول خروج إعلامي، لـ”كود” عن أهم الأحداث لي أثرات فحياتو، وكشف سر التحاقو بحزب التجمع الوطني للأحرار.

وأوضح زيدان، في حديث مع “كود”، بأن أول تاريخ رسم معالم شخصيتو، هو يوم 9 يوليوز 1983 نهار قرر يغادر المغرب نحول الديار الألمانية”، مضيفا: “كان يوم عطلة بمناسبة عيد الشباب، غادرت الأهل والأحبة ومشيت لعالم نسبيا مجهول”.

وقال زيدان لـ”كود”: “انتقلت من إنسان عايش جو عائلي إلى شخص خصو يقرر مصيرو بوحدو في المهجر”.

أما الحدث الثاني، فكان 2017، يقول زيدان: “فهاد العام عندما قررت ندخل عالم السياسة، واختارت حزب التجمع الوطني للأحرار، ولكن قبل هاد التاريخ وفهاد السياق كنت رئيس شبكة الكفاءات المغربية بألمانيا، واللي هدفها هو نقل الخبرة لي عند مغاربة المهجر لبلدهم الأم والدفاع عن مصالح مغاربة العالم في ألمانيا ومصالح بلدنا”.

واسترسل زيدان لـ”كود”: “وعندما كنت رئيس الشبكة درنا بزاف ديال الأعمال الخيرية والاجتماعية والثقافية والعلمية، وهي خلاتني نشوف واحد الجو لي خلق فيا رغبة بلي خصني نكون فاعل، وباش نكون فاعل خصني ندخل السياسة باش نكون مسؤول ونقرر”.

وتابع زيدان: “شفت العرض الوطني فالسياسة ولقيت الأحرار كيتوافق مع الفكر ديالي وكيفاش بغيت المغرب يكون والتحقت بحزب الأحرار سنة 2017، وكنت آنذاك منسق ديال الأحرار في ألمانيا ودرنا تظاهرات كثيرة وعطينا روح المواطنة لعدد من الفاعلين في ألمانيا وشنو ممكن يعطيو للمغرب، كانت شعلة انتماء وعطاء للوطن”.

أما الحدث الثالث والبارز في مسار زيدان، فهو: “نهار 23 أكتوبر لي ماعمرني نساه فحياتي، فاش استقبلني سيدنا وعيني فالحكومة وأديت القسم في المهام ديالي الحالية، كل الامتنان والشكر للملك لي شرفني بهاد المهمة لي تعطات ليا وندير ما في جهدي باش نكون فمستوى ثقة سيدنا”.

وشدد زيدان بلي هاد المهمة التزام ومسؤولية باش نجح فالعطاء ديالي ونكون فالمستوى المطلوب مني.

وأضاف زيدان لـ”كود”: “أيام قليلة بعد تعييني، جاء خطاب الملك يوم 6 نونبر لي خلق ضجة إيجابية وسط مغاربة العالم”، موضحا: “لأنه بعد خطاب 20 غشت 2023 ركز على أهمية كفاءات مغاربة العالم، جاء الخطاب الأخير باش يعطي رؤية ملكية سامية كيفاش هاد الكفاءات وهاد الخزان أنهم يجيو ويخدمو تطور البلاد لأنهم سفراء البلد في عدد من الدول وفعدد من الشركات الدولية وكيخدمو مصالح المغرب”.

وأوضح المتحدث بأن: “تحويلات مغاربة العالم تقدر بـ100 مليار درهم سنويا، تخصص للاستهلاك الأسري أغلبها، واللي موجهة للاستثمار فقط 10 فالمائة كيف جاء في خطاب الملك، وخصنا نبدلو كاملين مجهود باش نطلعو هاد النسبة”.

وتابع المسؤول الحكومي بالقول: “أنا على يقين، وأنا دوزت 35 سنة في ألمانيا، عارف قدراتها وغيرتهم على البلاد وتلاحمهم حول العرش العلوي وعارف أنهم يقدرو يعطيو المغرب ماشي غير 100 مليار درهم سنويا، وممكن يخلقو اكثر من هاد الرقم بمئات المرات”.

وقال الوزير زيدان: “نعطيو منصة ملائمة لمغاربة العالم باش يخلقو مشاريعهم سواء تنموية اقتصادية أو اجتماعية أو نقل خبرتهم إلى أرض الوطن”.