كود – وكالات //

هاد العام فـحفل Met Gala 2026، اللي كيتعتبر من أهم حفلات الموضة فالعالم، كانت الأجواء راقية وكيف ديما تجمعو نجوم كبار من مختلف المجالات، الحفل تنظّم فـمتحف المتروبوليتان للفنون فـ نيويورك، ودار شعار “الموضة فن”، اللي خلا المشاركين يبدعو فطلاَّت ديالهم بطريقة فنية ومختلفة.

https://www.instagram.com/metgalaofficial_?igsh=ZG00aW0weTFpaXBj

ومن بين الحضور اللي دارو الانتباه هما بيونسي وبنتها بلو آيفي، ريهانا، مادونا كيتي بيري، كيم كارداشيان، كاردي بي، نيكول كيدمان، فينوس وليامز، ستيفي نيكس، بلايك لايفلي، سابرينا كاربنتر،…

الحفل عرف حضور تقريبا ديال 400 واحد، وكل واحد حاول يعبّر على العلاقة ديالو مع الموضة كفن حيّ، وحتى الديكور كان مستلهم من لوحات الفنان كلود موني، لي حوّل الفضاء لواحد الحديقة شاعرية فيها الورد والخضورية بحال شي  لوحة فنية.

فالرئاسة ديال الحفل كانو أسماء كبار بحال فينوس ويليامز، نيكول كيدمان، بيونسي،عاد آنا وينتور اللي عندها دور كبير فشهرة هاد الحدث عالميًا، و سانشيز بيزوس مرات جيف بيزوس، اللي لبسات كحل موخود من لوحة فنية معروفة واللي تبرعات هي وراجلها ب 10 مليون دولار الحفل .

و من الطلات لي كانو أكثر جرأة وخلاو الكاميرات مكتحبسش من الفلاش هي الطلة ديال  الفنانة الفرنسية الجزائرية لينا محفوف لي خذات الأنظار كاملين فالزربية الحمرا ديال حفل ميت غالا 2026 مني لبسات لباس طويل باللون الزرق السماوي من تصميم بورك أكيول، اللي كان محلول من الجناب وشدات صدرها بجوج يدين اللي عطاو لمسة فنية مكاينش فحالها

بشكل عام، حفل “ميت غالا” 2026 كان فيه الفن، والجرأة، والخيال، وكل استعراض كان بحال عمل فني كيتحرك، وكيعبّر على شخصية اللي لابسها مولاها بطريقة مختلفة وميزة.