كود سبور//

كيبان أن قرار الدولي الفرنسي كيليان مبابي بالرحيل على psg صعيب يتقبلوه القطريين اللي هما المالكين ديال باريس سان جرمان الفرنسي، واخا كيحاولو يبينو أن الأمور عادية.

وحسب جريدة Le Parisien الفرنسية، فقبل ما يبدا ماتش باريس سان جيرمان ضد تولوز الاحد اللي فات ضمن منافسات بطولة فرنسا، وهو آخر ماتش غايلعبو كيليان مبابي مع PSG  فتيران بارك دي برانس، ناضت مضاربة بين النجم الفرنسي وبين القطري ناصر الخليفي مول باريس سان جرمان.

وكشف نفس المصدر، أن مول PSG  وكيليان مبابي كانو كيتغاوتو فشي غرفة فتيران بارك دي برانس لدرجة أن الغوات ديالهم زعزع لحيوط ديال التيران، فتعبير من مصدر الجريدة الفرنسية على حدة وقوة النقاش والخصام اللي كان بين الطرفين، وقالت le parisien انه من بين أسباب هاد الخصام هو أن ناصر الخليفي ما تقبلش الطريقة باش ودع بها مبابي النادي ففيديو حطو على إنستغرام قبل ايام، حيث شكر فيه كلشي المسؤولين ديال النادي والمدربين اللي عاش معهم فيه، ولكن ما جبدش حس الخليفي وما حاشاهاش له وما شكروش.

وكيبين هادشي أن ناصر الخليفي مول PSG وهو واحد من المستثمرين القطريين اللي كتعول عليهم قطر فالاستثمارات ديالها الخارجية فأوروبا وعلى المستوى الرياضي اللي كتستغلو كقوة ناعمة، ما مسروطاش له أنه خسر لاعب كبير بقيمة كيليان مبابي، اللي صعيب يلقى لاعب بحالو حاليا فالمارشي ديال الكورة، خصوصا وأن النجم الفرنسي كان كيتعتبر قوة كروية وقيمة تسويقية مهمة للنادي الفرنسي الجنسية وقطري الرأس مال.